![](https://albanianpost.com/wp-content/uploads/2023/12/besnik-tahiri.jpg)
Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, nëpërmjet një postimi në “Facebook” të enjten, shpërtheu ndaj kryeministrit kosovar, Albin Kurti, duke thënë se “ky njeri përfaqëson një zero të madhe në lidership” pas propozimit që draft-statuti për Asociacionin e Komunave me Shumicë Serbe të dërgohet në Komisionin e Venecias.
“Pse nuk e pyet veten ky njeri, deri kur dhe deri ku do të vazhdojë të qeverisë pa asnjë guxim që kërkon pozita ku është ulur. Thjesht, ky njeri përfaqëson një zero të madhe në lidership!”, shkroi ai, duke qenë se kryeministri udhëzoi diplomatët evropianë ta çojnë draft-statutin e propozuar në Komisionin e Venecias, ndërsa ky të vetin në Gjykatën Kushtetuese të Kosovës.
Përkundër se Bashkimi Evropian (BE) e Shtetet e Bashkuara (SHBA) mbështesin veç draft-statutin “modern e evropian” të përfaqësuesit të posaçëm të BE-së për dialogun Prishtinë-Beograd, sa i përket pajisjes vetëmenaxhuese për serbët në Kosovë, kreu i ekzekutivit sugjeroi BE-në e SHBA-në ta çojnë draftin në Komisionin e Venecias për shqyrtim kushtetues.
“Kurti duhet ta dijë që në emër të Republikës së Kosovës, asnjë palë e tretë nuk mund dhe nuk ka mandat të dërgojë akte për shqyrtim. Por ajo që fshihet prapa rreshtave është që Kurti përmes përdorimit të emrit të BE-së, paralajmëron që do të ketë një draft i cili mund të përfundojë në Komisionin e Venecias”, konsideroi ndër të tjera shefi i deputetëve të AAK-së.
Përkundër se autoritetet kosovare kanë pasur mundësinë për 10 vjetët e fundit të përpunojnë një koncept të përshtatshëm për Asociacionin e Komunave me Shumicë Serbe – një detyrë urgjente juridikisht, ashtu edhe në aspektin urtisë politike – këtë hap nuk e ka bërë askush, përveç ekspertëve ligjorë të shteteve evropiane, posaçërisht të Francës dhe Gjermanisë.
“Në kërkim të një rrugëdalje nga qorrsokaku ku ka hyrë vetë dhe ku e ka futur Kosovën me temën e draftit të asociacionit dhe lënien e vendit në paradhomë të pritjes për anëtarësim në Këshillin e Evropës, ai kërkon që BE-ja e Lajçaku të shërbejnë si zëdhënës të qeverisë, duke sugjeruar që ata ta qojnë draftin në Komisionin e Venecias – amatorizëm dhe mashtrim klasik”.
Vjeshtën e kaluar, përfaqësuesi special i BE-së për dialogun mes Kosovës dhe Serbisë, Mirosllav Lajçak, ua paraqiti liderëve në Prishtinë dhe Beograd një draftstatut “modern e evropian” për Asociacionin e Komunave me Shumicë Serbe. Ky draftstatut, në bazë të deklaratave të zyrtarëve evropianë, merr parasysh “vijat e kuqe” të përcaktuara nga Kushtetuta e Kosovës.
Ndryshe, themelimi i Asociacionit të Komunave me Shumicë Serbe konsiderohet obligim i pazbatuar, i cili buron nga marrëveshja e vitit 2013 në kuadër të dialogut për normalizimin e marrëdhënieve. Kjo është marrëveshja e vetme e dialogut që është ratifikuar nga Kuvendi i Kosovës me dy të tretat e votave dhe ka fuqinë ligjore të një marrëveshjeje ndërkombëtare.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com