Tahiri i reagon Kurtit: Qeveritë janë për të zgjidhur problemet, për këtë marrin votat

Ish-kryengociatorja e Kosovës në dialogun me Serbinë, Edita Tahiri, i ka reaguar Kryeministrit Albin Kurti, teksa iu referua deklarimeve të tij se fajin për krizën me energji elektrike e kanë qeveritë e kaluara.

Ajo përmes një postimi në llogarinë e saj në Facebook, ka thënë se qeveritë janë për të zgjidhur problemet, prandaj edhe marrin votat e përgjithshme.

“Qeveritë janë për të zgjidhur problemet sepse për këtë punë kanë marrë votat, dhe jo për të fajësuar qeveritë e kaluara”, ka shkruar Tahiri.

Ndërkaq, Kryeministri Kurti, në fjalimin e tij në mbledhjen e 45-të të Këshillit të Përgjithshëm të Vetëvendosjes, ka kritikuar ish-qeveritë.

“Ajo që gjetëm në shumë pjesë ishte më keq se që e mendonim, një shtet përtokë që gjakonte në gjitha anët e tërësisht i papërgatitur për sfidat e shekullit të 21-të”.

Kurti ka folur edhe për mungesën e energjisë elektrike me të cilën po përballet Kosova.

Ai ka theksuar se e kupton frustrimin e qytetarëve dhe se edhe është edhe vetë i frustruar me mungesën e energjisë, e cila sipas tij “është shkaktuar sa nga faktor të jashtëm jashtë kontrollit tonë po aq edhe nga mungesa e vizionit për të marrë vendime për të ardhmen nga ata që qeverisën për më tepër se dy dekada”.

“Më besoni edhe vet jam i frustruar”, potencoi Kurti.

“Derisa kërkesa për energji nga qytetarët e ekonomitë është rritur për çdo vit, prodhimi nga KEK-u ka mbetur i njëjtë e ndërkohë ka pasur edhe vjedhje e vendime të gabuara që e kanë sjellë sektorin energjetik buzë kolapsit”, ka thënë Kurti.

“Por, le të jetë ky një rikujtim për gjendjen në të cilën e lanë shtetin ata që qeverisën për dy dekada, sepse si njerëz të territ që ishin e që punët i bënin natën jashtë syve të qytetarëve, ata s’kishin si ta linin Kosovën ndryshe pos në terr e skëterrë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.