Tabaku sërish në SPAK për Inceneratorët: 50 persona dhe 112 prova të reja

Nënkryetarja e Partisë Demokratike, Jorida Tabaku, të premten e 18 marsit ka bërë me dije se do të dorëzojë në Prokurorinë e Posaçme (SPAK), një padi të re për “aferën e inceneratorëve”.

50 persona dhe 112 prova të reja që tregojnë shkeljet e qeverisë do të dorëzohen në SPAK duke i bërë thirrje kësaj të fundit për një hetim dhe angazhim të mëtejshëm.

“Është dorëzuar një raport i pozitës ku janë prova, fakte, procesverbale dhe të gjitha rezultatet që kemi pasur nga Komisioni Hetimor, që tregon se si është injoruar procedura”, tha Tabaku.

Duke përmendur punën e Komisionit Hetimor, ku raporti i opozitës u votua kundër në parlament, Tabaku njëkohësisht dhe kryetarja e këtij komisioni theksoi se, “nga ana e mazhorancës patëm një raport prej 44 faqesh që dështoi të provonte ata që ato pretendonin”.

Kujtojmë që raporti i mazhorancës për Komisionin Hetimor për Inceneratorët u votua në parlament me 76 vota pro dhe 34 kundër duke lënë pas atë të opozitës.

“PD-ja renditi nga i pari te i fundit dhjetë drejtues të lartë që dëshmuan përpara shqiptarëve. Shqipëria ndodhet në një krizë të thellë ndërkohë që koncensionari merr para nga buxheti i shtetit”, vijoi Tabaku në konferencën për shtyp.

Sakaq duke e quajtur qeverinë si grup i strukturuar kriminal, Tabaku shtoi se se, “PD-ja krahas tre padive të dorëzuara në SPAK gjatë javës së fundit të punës ka dorëzuar padi edhe për Arben Ahmetaj, Armando Subashi ddhe Erjon Veliajn”.

“Padia e sotshme përfshin 50 persona, përfshirë edhe anëtarët e zbatimit, të cilët kanë ndihmuar mbështetur, favorizuar tre kompani koncensionare. Ku kanë shkuar paratë? Tre individë pa asnjë eksperiencë, kapital, me të vetmen karakteristikë që ishin miq të njerëzve që janë në pushtet marrin 430 milionë euro duke shkelur procedurën”, ravijëzoi Tabaku.

Nga ana tjetë ajo shprehu keqardhjen ndaj deputetëve demokrat që votuan kundër raportit të opozitës për inceneratorët. 

“Ndjej keqardhje kur deputetë të PD-së bashkojnë votën me Edi Ramën ndaj korruspionit më të madh të këtyre 30 viteve. Sjellja më normale duhet të kishte qenë që nuk e voton, por jo që të votojë kundër.  Edhe sot e kësaj dite besoj se duhet të ishim bashkë në miratimin e këtij raporti”, e p%rmbylli ajo.

Komisioni Hetimor mbi inceneratorët

Ky Komision Hetimor u ngrit më 29 tetor 2021, pasi u miratua me një shumicë votash nga Kuvendi i Shqipërisë.

Në këtë mënyrë, Partia Socialiste pranoi kërkesën e Partisë Demokratike për ngritjen e Komisionit Hetimor për hetimin e inceneratorëve.

Sipas PD-së, në çështjen e inceneratorëve, ka pasur shkelje në të gjitha procedurat.

Kështu, roli i këtij Komisioni do të ishte kontrolli i ligjshmërisë së veprimeve administrative dhe procedurës së ndjekur nga ana e organeve ekzekutive në procedurat për ndërtimin dhe administrimin e impianteve të trajtimit të mbetjeve urbane në Tiranë, Elbasan dhe Fier.

Në kërkesën e PD-së u tha se Komisioni do të kishte si detyrë kontrollin e zbatimit të ligjeve nga ana e organeve publike në procedurat për ndërtimin dhe administrimin e impianteve të trajtimit të mbetjeve urbane, si dhe verifikimin e pasojave ekonomike në buxhetin e shtetit shqiptar.

Sakaq më 25 shkurt ishte mbledhja e fundit e punimeve të Komisionit Hetimor Parlamentar për inceneratorët, ku i fundit si dëshmitar ishte kryeministri Edi Rama.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.