Tabaku: Qeveria, mburojë e Lefter Kokës

Kryetarja e Komisionit Hetimor për Inceneratorët, Jorida Tabaku, përmes një deklarate për mediat të mërkurën e 19 janarit ka reaguar me tone të ashpra pasi përfaqësuesit e Partisë Socialiste nuk votuan për zgjatjen e punës së Komisionit për hetimet ndaj aferës së inceneratorëve.

Nënkryetarja e PD-së, u shpreh se me këtë vendim PS po tregon mbështetjen politike ndaj kësaj afere duke u bërë mburojë e Lefter Kokës.

“Fatkeqësisht PS votoi kundër aferës së inceneratorëve. Për 3 orë u përpoqa që kolegët t’i thërrasin arsyes dhe të votojnë planin. PD prezantoi sot një plan hetimi me 20 dëshmitarë. Për ditë më radhë kam kërkuar informacion nga institucionet shtetërore”.

Sipas Tabakut, ky Komision ka një fitore të vogël që është arrestimi i ish-ministrit të Mjedisit, Lefter Koka.

“Në zbatim të ligjit dhe vendimit të Kuvendit PS duhej të na lejonte ne ta vazhdonim këtë hetim. Sot PS doli mburojë e Lefter Kokës. Sot flasim për një grup të strukturuar kriminal dhe mbrojtjen politike që po i jepet kësaj afere. Ndryshe ky refuzim nuk justifikohet. PD është e vendosur që ta vazhdojë denoncimin e kësaj afere, denoncimet në SPAK deri kur personi i fundit, Edi Rama të shkojë para drejtësisë”.

Mesditën e 14 dhjetorit, Prokuroria e Posaçme(SPAK) lëshoi urdhër-arrestin për Lefter Kokën, i cili shërbeu si ministër i Mjedisit në vitet 2013-2017.

Arrestimi ka ardhur pasi u kallëzua penalisht nga Lëvizja Socialiste për Integrim për çështjen e inceratorëve.

Por, përveç Kokës, u shoqëruan edhe disa persona të tjerë.

Akuza e LSI-së lidhet me pretendimet për shkelje në ndërtimin e inceneratorit të Fierit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.