Sylvinho dhe Gjimshiti analizojnë Kroacinë – Ndeshje e vështirë ku ka rëndësi psikologjia, duhet kurajë

Shqipëria do të luajë ndeshjen e saj të dytë në grupet e Euro 2024 kundër Kroacisë të mërkurën e 19 qershorit dhe gjithë sytë e shqiptarëve janë për nga Hamburgu dhe për nga performanca e djemve kuqezinj.

Humbja 2 me 1 kundër Italisë ishte e dhimbshme, por nuk i ka shuar tërësisht shpresat e Kombëtare për një kualifikim historik nga grupet.

Siç e do edhe tradita, një ditë përpara ndeshjes kanë dalë në konferencë për shtyp trajneri i Kombëtares, Sylvinho si edhe kapiteni i ekipit, Berat Gjimshiti.

Të dy e kanë vendosur theksin tek vështirësia e lartë e ndeshjes dhe te faktori psikologjik, i cili do të luajë edhe rol kyç gjatë gjithë takimit.

“Gjëja më e rëndësishme është fakti se Kroacia është në rolin e favoritit. Në këto ndeshje që janë kaq të rëndësishme, duhet të kesh përqendrimin. Çdo gabim apo një problem, do të shfrytëzojnë rastet. Skuadra duhet të përmirësohet dhe të bëjmë gjithçka në fushë”, ka theksuar Gjimshiti në fjalën e tij.

Sipas tij, psikologjia është pikërisht faktori më i rëndësishëm tani. Po ashtu, edhe kurajo që duhet të ketë ekipi për ndeshje të tilla.

“Ne duhet të mësojmë. Unë kam më shumë përvojë se të tjerët, e përpiqem që të motivoj të tjerët. Kemi edhe ndeshje të tjera, që mund të shkojmë më keq se ajo me Italinë”, shtoi ai.

Nga ana tjetër, Sylvinho është ndalur te vështirësia e lartë e kundërshtarit me të cilin kuqezinjtë përballen.

“Ky është grup i vështirë, patjetër. Ky është një gëzim i madh që jemi këtu. Nuk ka negociata fare, ne do të bëjmë më të mirën.  Ky është një kompeticion është i mrekullueshëm, asnjëherë nuk do heq dorë nga kualifikimi”, filloi ai.

Më tej, pati edhe disa reflektime rreth ndeshjes Spanjë – Kroaci, e cila u mbyll në shifrat 3 me 1 për iberikët.

“Kroacia pati mundësi ndaj Spanjës, i hapi punë spanjollëve. Ishte një ndeshje e mirë. Spanja ka shënuar golat që iu duheshin në 29 minuta. Kroacia ka aftësi teknike dhe cilësi të lartë.  Ju e keni parë ndeshjen vetë dhe se sa e vështirë është Kroacia. Modriç me shokë, çfarë mund të them, është gëzim më vete të luan ndaj tyre”, përmendi tekniku shqiptar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.