![](https://albanianpost.com/wp-content/uploads/2023/10/kuvendi-.jpg)
Në seancën e së enjtes Kuvendi i Kosovës ka dështuar që ta votojë përfshirjen e Konventës së Organizatës së Kombeve të Bashkuara për personat me aftësi të kufizuara në nenin 22 të Kushtetutës së Kosovës.
Kryetari i Kuvendit, Glauk Konjufca, ka thënë se nuk ka kushte objektive për votim të amendamenteve të Kushtetutës.
Prezantimin dhe nevojën për votimin për përfshirjen e kësaj Konvente në Kushtetutë, në seancën ku ishin pjesëmarrës edhe përfaqësues të personave me aftësi të kufizuara, e bëri Ministri i Shëndetësisë, Arben Vitia.
Vitia në fjalën e tij tha se kjo e drejtë është e njohur ndëkombëtarisht, prandaj duhet të jetë edhe në Kushtetutën tonë.
“Respektimi i të drejtave të njeriut zbatohet ndaj të gjithëve pa dallim. Sot po propozohet përfshirja e Konventës së Kombeve të Bashkuara si amendament kushtetues. Një e drejtë që është ndërkombëtarisht e njohur të normohet edhe me Kushtetutën e Kosovës”, ka thënë ai.
“Konventa e OKB-së për të drejtat e personave me aftësi të kufizuara fuqizon pasqyrën kushtetuese dhe ligjore për sa i përket mbrojtjes dhe avancimit të të drejtave të personave me aftësi të kufizuara në të gjitha fushat. Andaj, marrë parasysh sa i rëndësishëm është ky amandamentim, ju lutem dhe ju ftoj ta votoni këtë ndryshim kushtetues”, shtoi.
Ndryshe, Kuvendi i Kosovës këtë të enjte do t’i mbajë dy seanca parlamentare.
Seanca e parë ka filluar pas orën 10:00, dhe kishte vetëm një pikë në rend të ditës: “shqyrtimi i Propozim-amendamentit Kushtetues nr.27”.
Nga ana tjetër, seanca e dytë ka në rend dite 12 pika.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com