Sveçla: Konfiskimi i armëve dëshmon vendosmërinë për të luftuar tendencat destabilizuese të Beogradit

Ministri i Punëve të Brendshme, Xhelal Sveçla.

14 Qershor 2024 / 22:00

Ministri i Punëve të Brendshme, Xhelal Sveçla, pas konfiskimit të armëve në Veri të Kosovës, e ka quajtur këtë operacion “vendosmëri” për ta luftuar tendencën destabilizuese që ka për synim Serbia.

“Sërish armë, eksplozivë e municion i konfiskuar në veri të vendit dhe kjo falë vigjilencës së shtuar të institucioneve tona dhe vendosmërisë për asgjësimin e secilit element kriminal dhe tendencës destabilizuese që vjen nga Beogradi”, ka shkruar ai në rrjetin social ‘Facebook’.

Ai ka ripërsëritur se s’do ta ndalin betejën e tyre për të krijuar një shtet të së drejtës.

“Bashkërendimi mes institucioneve të sigurisë dhe rritja gjithnjë e më shumë e bashkëpunimit me qytetarët në veri të vendit është garancë e mosndalimit në betejën tonë për shtet të së drejtës ku rendi dhe ligji mbizotërojnë mbi krimin e terrorizmin”.

Policia e Kosovës, ka bërë të ditur se konfiskimi i sasisë së armatimit në Veri të Kosovës, është bërë në bashkëpunim me Agjencinë e Inteligjencës (AKI).

Zëvendësdrejtori i Policisë së Kosovës për rajonin e Veriut, Veton Elshani, në një konferencë për media ka thënë se operacioni është bërë në disa lokacione ku ndodhej armatim i fshehur nga ish-pjestarë të Mbrojtes Civile dhe pjesëtarë të grupit terrorist të Banjës.

“Lokacioni i parë ka qenë në Veri të Mitrovicës, në afërsi të Tre Rrokaqiejve, ndërlidhet me personin në kërkim, Marjan Radojeviç, ndërsa lokacioni tjetër ka qenë në rrugën “Çeta e Minatorëve”, në Veri të Mitrovicës që ndërlidhet me subjektin në kërkim Zharko Cvetkoviç”, ka thënë fillimisht Elshani.

Më pas ai ka treguar edhe ato që janë konfiskuar në katër lokacione.

Elshani, ka theksuar se në lokacionin e tretë janë gjetur armë të gjata.

“Në lokacionin e tretë janë gjetur armë e gjatë me bajonetë, një pistoletë me dy karikatorë me nga tetë fishekë 7×62 dhe një fotrollë, çantë e zezë me pajisje për pastrim të armës, dy kuti me nga 50 fishekë 7×62, tre karikatorë me fotrolla me nga tetë fishekë, armë e gjatë gjuetie me çantë”.

“Ndërsa në lokacionin e katërt janë gjetur iriq metalik, jelek i brendshëm antiplumb, 30 copë mjet i dyshuari eksploziv TM 100, një uniformë, çantë e zezë me pajisje të ndihmës së parë dhe adapter për radiolidhje”.

Edhe më 13 qershor, ministri i Punëve të Brendshme, Xhelal Sveçla, njoftoi se Policia e Kosovës konfiskoi sasi të konsiderueshme të armatimit në pjesën veriore të territorit të Kosovës të banuar me shumicë serbe, përfshirë një armë të gjatë, mjete eksplozive, municion, radiolidhje, antiplumba e pajisje teknologjike.

“Vijon suksesshëm angazhimi ynë në ç’rrënjosjen e krimit dhe largimin e mbetjeve kriminale të Serbisë në vendin tonë. Armë dhe mjete eksplozive si granatë dore, armë e gjatë, municion, radiolidhje, antiplumba e pajisje teknologjike janë zbuluar sot nga Policia e Kosovës gjatë bastisjes në një lokacion në fshatin Uglarë të Zubin Potokut”, deklaroi ministri Sveçla.

Prej sulmit terrorist të 24 shtatorit 2023 në Banjskë të Zveçanit – një nga katër komunat e banuara me shumicë serbe – në pjesën veriore të vendit, ku një grup prej dhjetra paramilitarësh serbë sulmuan Policinë e Kosovës, autoritetet kosovare kanë prezantuar disa herë armatim të konfiskuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com