Ministri i Punëve të Brendshme, Xhelal Sveçla, në një përgjigje për agjencinë kosovare të lajmeve “Ekonomia Online” të hënën në mëngjes, derisa komentoi thirrjet e bashkësisë së organizuar ndërkombëtare që Kosova të përmbahet nga “veprimet e njëanshme” në veri, vlerësoi se partnerët “s’po e kritikojnë” ekzekutivin kosovar për aksionet policore në këtë zonë.
“Nuk ka kritika, por ka brenga të cilat kohë pas kohë ata i shfaqin. Ne bashkëpunojmë ngushtë më të gjithë, ne i kuptojmë brengat e tyre, por po ashtu qeveria e Republikës së Kosovës ka obligim, qoftë ndaj gjeneratave të tanishme, por edhe brezave të ardhshëm, që njëherë e përgjithmonë situatën atje ta stabilizojë në të mirë të rendit dhe ligjit”, theksoi ministri kosovar.
Autoritetet në Kosovë, në mes të muajit të kaluar, ndërmorën një operacion policor ndaj institucioneve financiare serbe që vepronin ilegalisht në pjesën veriore të territorit kosovar, që rezultoi me mbylljen e gjashtë filialeve të “Bankës Kursimore të Postës” dhe “Bankës Popullore të Serbisë” në katër komunat veriore të Kosovës të banuara kryesisht me shumicë serbe.
Policia e Kosovës, në një komunikatë mbi aksionin e zhvilluar më 20 maj në veri të vendit, ku u mbyllën gjashtë njësi të institucioneve financiare të Serbisë, njoftoi se është konfiskuar një sasi e konsiderueshme e parave, përkatësisht rreth 1 milion e 600 mijë euro dhe 74 milionë e 700 mijë dinarë në funksion të “vendosjes së rendit dhe ligjshmërisë” në këtë zonë.
Shtetet e Bashkuara (SHBA) dhe Bashkimi Evropian (BE) kritikuan Kosovën për mbylljen e zyrave financiare serbe, duke shtuar se aksioni i fundit policor dëshmoi se autoritetet kosovare zgjodhën “veprimet e njëanshme” para bashkëpunimit. Ata shprehën drojën se operacioni i fundit mund t’i “përshkallëzojë tensionet” ekzistuese ndërmjet Kosovës dhe Serbisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Serwer vlerëson se bisedimet teknike mes Kosovës dhe Serbisë kanë dhënë më shumë rezultate sesa dialogu në nivel politik
-
Gërvalla: KiE të marrë sa më shpejtë një vendim për Kosovën
-
Kurti uron Berset: Kosova thellësisht e përkushtuar për vlerat themelore të Këshillit të Evropës
-
Bajrami thotë se raporti që iu dërgua BE-së për Banjën është “faktik” dhe “bindës”
