Sveçla e quan “dështim të drejtësisë” rastin në “Bon Vivant”: Palët e përfshira në konflikt kanë dhjetëra vepra penale

Ministri i Punëve të Brendshme, Xhelal Sveçla, pas rastit tragjik që ndodhi në orët e vona të së premtes në “Bon Vivant”, ku një person ka vdekur dhe disa të tjerë janë lënduar, ka thënë se rastet e tilla po ndodhin si pasojë e “dështimit të drejtësisë”, duke shtuar se palët e përfshira në konflikt “kanë dhjetëra vepra penale”.

Përmes një postimi në Facebook, Sveçla fillimisht tha se “dje, dy kriminelë morën dënimet e merituara, njëri ndër ta me burgim të përjetshëm”, duke shtuar se “megjithë dënimin kapital, nuk mund të themi se drejtësia është shërbyer”, duke iu referuar dënimit me burgim të përjetshëm që gjykata e Ferizajt e mori të premten ndaj Dardan Krivaqës për vrasjen e Marigona Osmanit.

“Ndëshkimi erdhi vetëm pasi humbëm një jetë të re, atë të Marigonës. Duhet të humbte jetën e saj një nëntëmbëdhjetë vjeçare, dhe në mënyrën me te dhunshme, që sistemi i drejtësisë të ndjente peshën e krimit. Nuk pati ndëshkim për 135 veprat penale të mëhershme të Dardan Krivaqës. Nëse drejtësia do të kishte reaguar në kohën e duhur, Marigona do të ishte gjallë”.

Ndërsa, shtoi se “edhe sot humbëm një jetë nga dora e kriminelëve të cilët, për arsye të dështimeve të drejtësisë, kanë qenë të lirë”.

“Në qendër të kryeqytetit, shtetasit tanë janë të rrezikuar për shkak të kriminelëve që nuk po ndëshkohen nga drejtësia. Ata duke u ndjerë të plotfuqishëm përballë ligjit nuk hezitojnë që hesapet e tyre kriminale t’i zgjidhin me armë e atë në lokale publike në prezencë dhe duke rrezikuar dhjetëra të rinj të tjerë”.

Palët e përfshira në konflikt, tregon ministri, “kanë me dhjetëra vepra të mëhershme penale”, duke shtuar se “kur lëngon drejtësia, situatat e ngjashme janë të pashmangshme!”.

“Drejtësia është punë e policisë, e prokurorëve dhe gjyqtarëve. Drejtësia është një sistem i plotë kur të gjithë institucionet përmbushin funksionin e tyre”.

Ndërkaq, Sveçla potencoi se është koha e fundit që “efikasiteti i Policisë në këtë segment të rritet, por mbi të gjitha përgjegjshmëria dhe vendosmëria e Prokurorisë dhe guximi i gjykatësve për dënime drakonike për këtë kontingjent kriminal”.

“Drejtësia është virtyt që duhet mbrojtur nga e tërë shoqëria, përfshirë aktivistët e shoqërisë civile dhe gazetarët. Ndjenja e të drejtës duhet të jetë shqetësim për të gjithë ne. Shembujt e ndëshkimit të krimit shërbejnë edhe si mbështetje për rolin e policisë sonë”.

Tutje, ministri Sveçla bëri me dije se dikasteri që ai e udhëheqë në kuadër të strategjisë kundër krimit të organizuar “do të iniciojë themelimin e një taskforce për hetimin e thellë, jo vetëm të këtij rasti, por edhe të rasteve të tjera të ngjashme!”.

Ndryshe, në rastin tragjik të orëve të vona të së premtes në një nga lokalet më të famshme të kryeqytetit “Bon Vivant”, ku si pasojë një person ka vdekur dhe disa të tjerë janë lënduar, pas të shtënave me armë dhe përplasjeve fizike, kanë qenë të përfshirë edhe eksponentë të botës së krimit dhe që janë të kërkuar ndërkombëtarisht.

Në këtë ngjarje i vdekur ka mbetur 39 vjeçari nga Komuna e Drenasit, Kastriot Ramadani.

Të dyshuar se kanë marrë pjesë në këtë ngjarje, sipas raportimeve të mediave, janë; Andi Pajaziti, i njohur me nofkën “Italiani”, si dhe Dukagjin Nikollaj, i njohur me nofkën “Duka”.

Siç raportohet, Pajaziti apo “Italiani”, është kapur nga policia, pasi që i njëjti është plagosur dhe ndodhet në spital, ndërsa Dukagjin Nikollaj, ka arritur që të shmanget dhe ndodhet në arrati.

Ndërsa, Nikollaj është i kërkuar nga FBI, i dyshuar si pjesë e bandës “Krasniqi Organization”.

Një i vdekur, 21 të lënduar – Krejt çka dihet për rastin në “Bon Vivant”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.