Një ndeshje do të luhet këtë të premte në Abissnet Superiore. Dinamo do të përballet me Vllazninë në “Elbasan Arena”, për javën e 14 të kampionatit.
Dy skuadrat që hapin dhe javën e 14, do të ndeshen duke filluar nga ora 19:45. Kryeqytetasit kërkojnë të rikthehen te rezultati pozitiv në kampionat pas tre humbjeve të njëpasnjëshme.
Aktualisht, skuadra e Vllaznisë në renditje ka 10 pikë më shumë se ajo e Dinamos. Kuqeblutë renditen në vendin e tretë. Blutë e kryeqytetit në vendin e shtatë.
“Nëndetësja blu” në gjashtë sfidat e luajtura si ekip pritës, numëron vetëm një fitore, tre barazime dhe dy humbje. Shkodranët në transfertë gjithashtu kanë vetëm një fitore, katër barazime dhe një humbje.
Dinamo ka shënuar katër gola dhe ka pësuar pesë, në ndeshjet si vendase. Kuqeblutë jashtë fushe kanë arritur të shënojnë tetë gola dhe të pësojnë po aq.
Në pesë sfidat e fundit në Superiore, Dinamo numëron tre humbje, një fitore dhe një barazim. Vllaznia numëron katër fitore dhe një barazim.
Në përballjen e fundit mes dy skuadrave, të luajtura gjatë fazës së parë të kampionatit, ishin shkodranët që triumfuan.
Sfida në “Loro Boriçi” përfundoi në shifrat 6-3. Fallou Diagne, Fahrudin Durdevic, Ante Aralica (dopietë), Fjoart Jonuzi dhe Zinedin Mustadanagic shënonin për Vllazninë. Agim Ibraimi (dopietë) dhe Xhuliano Skuka shënonin për miqtë.
Në dekadën e fundit, dy skuadrat janë përballur 20 herë. 12 fitore kanë shkuar për Vllazninë, pesë për Dinamon dhe tre ndeshje kanë përfunduar në barazim.
/Albanianpost.com
