Sulmohet fizikisht U.D drejtori i minierës së Trepçës

Të enjten është sulmuar fizikisht ushtruesi i detyrës së drejtorit të minierës së Trepçës, Bahri Karaqa.

Lajmin për Albanian Post e ka konfirmuar zëdhënësi i Policisë për rajonin e Mitrovicës, Avni Zahiri.

“Rreth orës 11:00, ankuesi M/K/Sh, ka raportuar se në vendin e tij të punës në zyrat e Minierës në Trepçë, është sulmuar nga i dyshuari M/K/Sh”, ka thënë Zahiti për AP.

Teksa ka shtuar se i dyshuari është akoma duke u intervistuar nga Policia e Kosovës.

“Viktima ka kërkuar tretman mjekësor, i dyshuari është duke u intervistuar”.

Më 5 nëntor, Bordi i Përkohshëm i Drejtorëve të ndërmarrjes “Trepça”, kishte njoftuar se në mbledhjen e jashtëzakonshme të së dielës, ku është diskutuar për situatën e krijuar pas grevës 10 ditore të minatorëve, ka marrë vendim për hapjen e konkursit për kryeshef të kombinatit metalurgjik duke marrë parasysh se kjo pozitë ka qenë me ushtrues detyre për një periudhë pothuajse 2 vjeçare.

Minatorët e kombinatit metalurgjik “Trepça” kishin hyrë në grevë më 24 tetor në kërkim të kushteve më të mira të punës, shkarkimin e menaxhmentit dhe ekzekutimin e pagave të tyre me kohë.

Ata kishin ndërprerë grevën 10 ditore pas arritjes së marrëveshjes me disa nga deputetët e Lëvizjes Vetëvendosje (LVV) mbi kushtet e tyre gjatë javës së kaluar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.