Sulmi kibernetik që mori prej JBS-së 11 milionë dollarë

JBS-ja, një nga kompanitë më të mëdha në botë për përpunimin e mishit, për t’i dhënë fund një sulmi kibernetik është detyruar të paguajë në shpërblim 11 milionë dollarë.

Agjencia e lajmeve, BBC, tregon se rrjetet kompjuterike në JBS u hacker-uan gjatë javës së kaluar çka çoi në mbylljen e përkohshme të disa operacioneve në Australi, Kanada dhe Shtetet e Bashkuara të Amerikës.

Kompania ka pohuar se shuma e dhënë ishte e nevojshme të paguhej për të mbrojtur klientët dhe pretendohet se kjo pagesë është realizuar duke përdorur Bitcoin-in.

Nëse nuk paguhet një shpërblim në kriptomonedhë, gjatë një sulmi ransomware, hacker-at futen në një rrjet kompjuterik dhe kërcënojnë të shkaktojnë përçarje ose të fshijnë skedarë.

“Ky ishte një vendim shumë i vështirë për t’u marrë për kompaninë tonë dhe për mua personalisht”, është shprehur shefi ekzekutiv i JBS-së, Andre Nogueira.

Sipas kompanisë, pagesa u krye për shkak të sofistikimit të sulmit, edhe pse “shumica dërrmuese” e impianteve të saj mbetën në rrafsh operacional.

Prej sulmit, JBS u detyrua që përgjatë një dite të ndalonte therjen e bagëtive në të gjitha fabrikat e saj në SHBA.

Mirëpo, kjo përçarje kërcënoi furnizimet e ushqimit dhe rrezikoi çmime më të larta të ushqimit për konsumatorët.

Ndërkohë, Shtëpia e Bardhë ka hedhur supozimet e saj mbi sulmin duke thënë se pas tij është një organizatë kriminale “me gjasë e vendosur në Rusi”.

SHBA-ja ka përjetuar edhe gjatë muajit të kaluar një sulm ransomware prej të cilit shpërndarja e karburantit në jug-lindje të SHBA-së ishte e gjymtuar për disa ditë pasi sulmi kishte në shënjestër Naftësjellësin Kolonial.

BBC shkruan se hetuesit kanë thënë se ky sulm ka qenë gjithashtu i lidhur me një grup me lidhje me Rusinë.

Nga ana tjetër, Naftësjellësi Kolonial ka konfirmuar se i ka paguar një shpërblim prej 4.4 milionë dollarë bandës kriminale kibernetike që ishte përgjegjëse për sulmin.

Ndërkohë, Departamenti i Drejtësisë ka rikuperuar afro 2.3 milionë dollarë.

Për sa i përket, JBS-së, e cila është një kompani me bazë në Brazil, ka pohuar se “rezultatet e hetimit paraprak konfirmojnë se asnjë kompani, klient ose të dhëna për punonjësit nuk janë komprometuar”.

Javën e ardhshme, pritet që presidenti amerikan, Joe Biden, të takojë homologun e tij rus Vladimir Putin në Gjenevë.

Ai po niset në udhëtimin e tij të parë zyrtar jashtë vendit, me një paralajmërim drejt Rusisë se ajo përballet me pasoja “të fuqishme dhe kuptimplota” nëse kryen “veprimtari të dëmshme”.

“Shtëpia e Bardhë është duke u angazhuar drejtpërdrejt me qeverinë Ruse për këtë çështje dhe duke dhënë mesazhin se shtetet me përgjegjësi nuk strehojnë kriminelë ransomware”, ka thënë një zëdhënëse e Shtëpisë së Bardhë gjatë javës së kaluar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.