Sulmi i rëndë me armë ndaj Top Channel, një automjet i djegur dyshohet si i autorëve

Pas sulmit me breshëri kallashnikovi drejt godinës së Top Channel –  ku një punonjës mbeti i vdekur – një makinë e djegur është gjetur në autostradë.

Bëhet fjalë për një tip “Range Rover” që dyshohet të jetë mjeti që autorët përdorën për sulmin ndaj zyrave të televizionit.

Makina u gjet e shkrumbuar në Golem të Kavajës dhe pranë saj kanë mbërritur efektivët për të kryer ekspertizën, pasi dyshohet se edhe kallashnikovi i përdorur në sulm ndodhet aty.

Targat e mjetit mendohet se janë të vjedhura dhe sipas informacioneve paraprake dyshohet se në të kanë qenë 3 persona.

Ngjarja e rëndë ndodhi pas orës 1:00 të mesnatës, ku breshëria e kallashnikovit nisi përplasjen drejt ambienteve të Top Channel-it në Mëzez.

Personat e paidentifikuar lanë të plagosur shtetasin Pal Kola, 60 vjeç, i cili fatkeqësisht humbi jetën rrugës për në spital, pasi mori një plumb në trup.

Kola po qëndronte në kabinën e tij kur plumbat nisën të derdheshin mbi godinë.

Ndarja e tij nga jeta erdhi teksa po transportohej për në Spitalin e Traumës në Laprakë.

Ende nuk dihet se çfarë motivi mund të fshihet pas këtij sulmi të rëndë ndaj televizionit.

Sulmi ndodhi te hyrja kryesore e Top-it, më pak se 200 metra larg studios ku aktualisht po zhvillohet programi Big Brother Vip.

Ndërkohë vetë Policia ka bërë me dije se është ngritur grupi hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.

Gjithashtu, shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve.

Qëllohet me armë godina e Top Channel, humb jetën një punonjës

Presidenti i Republikës, Bajram Begaj dhe kryeministri Edi Rama dënuan sulmin.

Ata shprehën ngushëllime për familjarët e viktimës dhe u bënë thirrje autoriteteve të ligjit të vijojnë hetimin dhe zbardhjen e ngjarjes.

Për Ramën, grupi i Top Channel meriton solidaritetin e të gjithëve në këtë moment kaq shqetësues.

Dënimit të aktit i është bashkuar edhe ministri i Brendshëm, Bledi Çuçi. Ai ka treguar se Policia është e angazhuar plotësisht për zbardhjen e sulmit.

Dënoj sulmin kriminal ndaj godinës së televizionit kombëtar @topchanneltv Policia e Shtetit bashkë është maksimalisht e përkushtuar për të zbardhur këtë ngjarje të rëndë dhe për të vënë para drejtësisë autorët. Ngushëllime familjes së të ndjerit dhe solidaritet me #TCH🙏

— Bledi Çuçi (@bledicuci) March 27, 2023

Ndërkohë opozita e ka cilësuar si një akt kriminal.

Kreu i Partisë së Lirisë, Ilir Meta shkroi se “edhe sot krimi e mori një jetë”.

“Sot një roje televizioni, para pak ditësh një pastruese lokali. Viktimat e krimeve nuk janë të largët e të panjohur, ata janë njerëzit tanë, bashkëqytetarët tanë, shqiptarët tanë. Bashkohem me pikëllimin dhe dhimbjen e familjarëve dhe gjithë shoqërisë sonë. Epoka e krimit duhet të marrë fund, që të vijë epoka e shqiptarëve”.

Gjithashtu edhe kryetari i komanduar i PD-së, Enkelejd Alibeaj tha se “sulmi me armë ndaj televizionit kombëtar, Top Channel dhe vrasja e rojës së sigurisë është një ngjarje e rëndë dhe akt kriminal të cilin e dënoj me forcë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.