Kulturë

Suksesi nuk numëron kromozome


“Unë jam Selma, me pasione dhe dëshira të mëdha. Unë ëndërroj shumë dhe besoj se, kur punon dhe e do diçka fort, ajo bëhet e jotja. Unë jam ngjitur një herë në një skenë teatri për të aktruar dhe, që atëherë, teatrin e kam dashur shumë”…

Janë këto fjalët e vajzës së veçantë, e cila, praninë e një kromozomi më shumë, e ka kthyer në motiv suksesi.

Thonë se suksesi është “gjendje e mendjes dhe shpirtit”. Ai është një mënyrë për t’u përballur me jetën e përditshme, duke kapërcyer vështirësitë, duke e pranuar veten tënde dhe duke e vënë atë në vijë të parë.

Suksesi gjen përkufizime të ndryshme, por eksperienca e atyre që mbajnë peshën e jetës dhe arritjeve bashkohen në një pikë: suksesi i vërtetë matet me sa i lumtur ti je me atë që ti ke!

Selma Allajbej na mëson shumë në këtë aspekt. Ajo është frymëzim jo vetëm për moshatarët e saj, por për këdo që e sheh jetën me skepticizëm. Ndryshe nga perceptimi i krijuar, individët me Sindromën Down nuk janë gjithmonë të lumtur.

Ata përjetojnë çdo emocion të jetës dhe mënyra sesi e menaxhojnë atë është shumë e ndryshme. Ata nuk janë as të njëjtë. Të njohësh dikë me Sindromën Down, nuk do të thotë që të gjithë individët me këtë sindromë janë të njëjtë.

Ne jemi të gjithë individë, pavarësisht sa kromozome kemi. Ata kontribuojnë në familjet e tyre, në shkolla, në ambiente pune me kolegët e tyre dhe, në shoqëri, në forma të ndryshme.

Selma u lind më 20 maj të 2002-shit, në qytetin e Kavajës. Kontributin në shoqëri do ta jepte që në moshë të vogël, duke treguar një interes të veçantë për artin dhe veçanërisht muzikën.

Ajo nuk i ka lënë dëshirat e saj në sirtar, por është angazhuar në aktivitete të ndryshme. Vullnet, punë dhe dëshirë, janë tri cilësitë e saj më të mira, të cilën e kanë bërë pjesë të botës së modelingut dhe aktrimit.

“Gjithçka ka nisur me aktivitetet që realizoheshin në shkollë, ku prezenca e saj gjithmonë i jepte tjetër ngjyre festës. Që herët, në fëmijëri i është bashkuar Qendrës Xhonatan. Kjo qendër i dedikohet zhvillimit dhe integrimit të fëmijëve me Sindromën Down, falë së cilës i janë hapur shumë dyer”, rrëfen motra e Selmës, Ema.

Kushdo që i njeh nga afër apo nga larg, e di lidhjen e fortë që ekziston mes tyre, pasi Ema e ka bërë atë publike, në emisionin televiziv “Ka një mesazh për ty” në Tv Klan, ku i dedikoi gjithë dashurinë prej motre.

Një ndër 20 faktet që lidhet me të njohurit të Sindromës Down (DS) pohon pikërisht këtë. Vëllezërit dhe motrat e individëve me këtë sindromë nuk ndihen ndryshe nga prezenca e tyre në familje, madje jeta e tyre është shumë normale. Pjesa më e madhe raportojnë që marrëdhënia e tyre është një ndër dhuratat më të çmuara në jetë.

Ajo eksperiencë televizive shënjoi popullaritetin e vajzës së veçantë, Selmës, duke e kthyer në personazh publik.

Me këto cilësi, spikati që në 2015-ën, në sfilatën e saj të parë, ku nuk i mungonte pozitiviteti dhe vetëbesimi në skenë.

Kjo, pasi tiparet e fytyrës së një individi nuk përcaktojnë aftësinë kognitive të tij. Vetëm sepse dikush ka disa prej tipareve fizike karakteristike të Sindromës Down, nuk do të thotë që ka nivel inteligjence apo performance më të ulët.

Gjithashtu, nëse dikush ka tipare fizike pak më të dallueshme, nuk do të thotë që inteligjenca e tyre është më e lartë. Këta fëmijë janë të zgjuar dhe ju duhen disa minuta që të kuptojnë pritshmëritë (apo komandat) për të reaguar apo përgjigjur.

Nga ata do të merrni atë çka prisni dhe nuk do të zhgënjeheni! Njohja e kontributeve që mund të japin në botë, dhe sa mund të arrijnë, është pjesë jetike e zvogëlimit të stigmës përreth aftësisë së kufizuar. Prandaj nuk duhet të mungojë mbështetja dhe angazhimi më i gjerë i tyre në shoqëri.

Për Selmën, angazhimi në botën e aktrimit është një tjetër ëndërr e realizuar. Ajo ka shkëlqyer në rolin e Zhulietës, “Romeo&Zhulieta”, kryevepra e Shekspirit, e cila u vendos në skenën e teatrit nga të rinjtë me Sindromën Down.

Më 21 mars 2016, ajo u bë zëri prezantues i një koncerti madhështor, ku pjesëmarrës qenë figura shumë të spikatura të muzikës shqiptare.

Një vit më vonë, sfiloi në sallën e Pallatit të Brigadave. Në atë sfilatë ishte prezente edhe modelja e parë ndërkombëtare me Sindromën Down, Madeline Stuart, si dhe presidenti i vendit, Ilir Meta, së bashku me përfaqësues të tjerë të rëndësishëm të organeve drejtuese dhe jo vetëm.

Viti 2018 u finalizua me një tjetër arritje, siç ishte pjesëmarrja në videoklipin e këngës “Origjinale në fuqi 21”, një himn thurur të rinjve me nevoja speciale.

Selma është shpallur “Aktivistja Speciale e vitit” nga Ministria e Arsimit, Sportit dhe Rinisë. Ndërsa me dashurinë për jetën dhe pozitivitetin që e karakterizon, aspiron të vazhdojë arritjet në aktrim, modeling dhe fusha të tjera ende të paeksploruara prej saj të artit.

“Sindroma Down është vetëm një pjesë e imja, jo një përkufizim i Kush Unë jam”. Është ky një ndër citatet e preferuara të saj.

Dita Botërore e Sindromës Dawn, 21 marsi, ka të bëjë pikërisht me njohjen se sa unikë janë këta individë, të cilët na mësojnë ta shohim botën përmes syve të dashurisë së pakushtëzuar.

Mesazhi është i thjeshtë: Paaftësia e vetme në jetë, është qasja negative ndaj saj, një kromozom më shumë është thjesht një “bekim i maskuar”.

Albanianpost.com


Lajmet kryesore