Kryetari i Bashkisë së Fierit, Armando Subashi, të hënën e 21 shkurtit, ka deklaruar se me biznesmenët Mirel Mërtirin, Stela Gugallen apo Klodian Zoton, është takuar dy ose tri herë për çështje teknike.
“Ka qenë momenti kur filluam të depozitonim mbetjet në impiantin e ri të përpunimit të tyre, së bashku me personat që kanë qenë të punësuar për administrimin e impiantit atje. Kanë qenë biseda për çështje teknike”, u shpreh ai.
Në Komisionin Hetimor për Inceneratorët, i thirrur si dëshmitar, Subashi u tregua i cunguar në informacion, për shkak të deklaratës së tij të dhënë më herët në Prokurorinë e Posaçme (SPAK).
“Për disa pyetje të caktuara do të jem i rezervuar për të dhënë faktet e mia, për të ruajtur sekretin hetimor”, deklaroi Subashi.
Pas Subashit, ka qenë zëvendëskryeministri, Arben Ahmetaj, i cili ka dëshmuar në Komisionin Hetimor.
Ai tha se Ministria e Ekonomisë- asokohe e drejtuar nga Ahmetaj- nuk ka pasur tagër për të dhënë mendim mbi një procedurë apo draft dhe as të përfshihet në dhënien e Partneritetet Publike Private (PPP).
Kurse për njohjen e biznesmenëve të sipërpërmendur, Ahmetaj u shpreh se “nuk e kam as gjak, as lidhje familjare, as lidhje krushqie, as partner biznesi dhe as kemi qenë ndonjëherë në të njëjtën punë.
“Zoton e kam të njohur në distancë”, deklaroi ai.
Komisioni Hetimor i ngritur për çështjen e inceneratorëve – vijon ende punimet e tij, që prej orës 11 të mëngjesit të datës 21 shkurt.
Seanca e kësaj dite është shoqëruar me debate të shumta mes anëtarëve të opozitës dhe mazhorancës.
Shkak kryesor u bë një takim i Tabakut, me kreun e Prokurorisë së Posaçme, Arben Kraja.
Në nisjen e procesit të kësaj dite, zëvendëskryetarja nga radhët e Partisë Socialiste, Ermonela Felaj, bëri me dije se Tabaku do të kallëzohet penalisht, pasi ajo nuk ishte mandatuar nga ky komision për të zhvilluar këtë takim me Krajën.
“Sipas deklarimeve që keni bërë gjatë ditës së sotme, ju qartësisht keni kërkuar që të nxisni SPAK-un për të vepruar konform interesave politikë të PD-së. I keni ofruar mbështetje politike SPAK-ut, keni ofruar dokumente në dispozicion ende pa marrë një vendim Kuvendi”, tha Felaj në fjalën e saj.
Pas akuzës së saj, nisi përplasja e Tabakut, duke i bërë me dije se ajo e kishte njoftuar javën e kaluar Komisionin për takimin që do të zhvillonte me Krajën.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
