Stoltenberg shprehet “thellësisht i shqetësuar” për retorikën secesioniste në Bosnje-Hercegovinë
![](https://albanianpost.com/wp-content/uploads/2023/11/sto.jpg)
Sekretari i Përgjithshëm i NATO-s, Jens Stoltenberg, në një konference për media së bashku me kryesuesin e Presidencës Trepalëshe të Bosnje-Hercegovinës, Denis Beqiroviç, shprehu shqetësim të thellë për retorikën secesioniste që dëgjohet në këtë vend, duke garantuar mbështetjen e plotë të NATO-s për integritetin territorial të Bosnje-Hercegovinës.
“NATO mbështet integritetin territorial dhe sovranitetin e Bosnje-Hercegovinës. Në të njëjtën kohë jemi thellësisht të shqetësuar me retoriken secesioniste dhe përçarëse që dëgjohet në Bosnje-Hercegovinë”, theksoi Stoltenberg, duke nënvizuar se angazhimi i NATO-s përfshin mbështetjen për përpjekjet e vendit për reformën e sigurisë dhe forcimin e aftësive mbrojtëse.
“NATO mbështet reformat në fushën e sigurisë në Bosnje e Hercegovinë dhe do të vazhdojë të ofrojë ndihmë në këtë drejtim, përfshirë edhe në modernizimin e forcave të armatosura”, shtoi ndër të tjera shefi i aleancës ushtarake të udhëhequr nga Shtetet e Bashkuara të Amerikës (SHBA), ndërsa përshëndeti avancimin e vendit në procesin e integrimeve evropiane.
Autoritetet e Republikës Serbe, posaçërisht udhëheqësi i serbëve të Bosnje-Hercegovinës, Millorad Dodik, refuzon kategorikisht autoritetin e Gjykatës Kushtetuese të Bosnje-Hercegovinës dhe zbaton një qëndrim konfrontues ndaj shteteve perëndimore, derisa hapur bën thirrje për pavarësi dhe flet publikisht për shkëputjen e entitetit serb nga Bosnje-Hercegovina.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com