Sterilizimi: GJKKO pranon kërkesën e SPAK, zgjat afatin e hetimit me 1 muaj e gjysmë

Gjykata e Posaçme GJKKO ka pranuar kërkesën e Prokurorisë së Posaçme SPAK për të zgjatur afatin e hetimit për dosjen e “Sterilizimeve” me 1 muaj e gjysmë.

Ndërkohë, kërkesa e SPAK-ut ishte për një zgjatje prej tre muajsh.

Sa i përket zgjatjes së afateve, kjo i referohet personave në hetim Klodian Rjepaj, Ilir Rrapaj Marsela Serjani dhe Saimir Kadiu.

Një ditë më parë, SPAK ka bërë me dije se ka sekuestruar kompani dhe aksione të biznesmenit Ilir Rrapaj, i akuzuar për “korrupsioni pasiv i funksionarëve të lartë shtetëror ose i të zgjedhurve vendorë”, lidhur me koncesionin e sterilizimit.

Kështu Gjykata ka sekuestruar pasuritë e mëposhtme:

Pjesët takuese prej 40 % të Shoqërisë “Sani Service” Sh.p.k, me numër Nipti L51910021C.

Shoqërinë “Investital Llc”, e regjistruar në Agjencinë e Biznesit në Kosovë.

Shoqërinë “Globalsher” Sh.p.k, me numër Nipti L62120029D, dhe asetet e saj, me ortak të vetëm personin nën hetim Ilir Rrapaj.

Janë sekuestruar 13 (trembëdhjetë) automjete të shoqërisë ‘Globalsher’ Sh.P.K, nga të cilat 3 të marra me qira dhe 9 në pronësi të kësaj shoqërie.

Gjithashtu, në qytetin e Vlorës është sekuestruar edhe një pasuri e paluajtshme apartament në pronësi të shoqërisë “Globalsher” Sh.p.k.

Ndërkaq SPAK ka vërtetuar se ish-zëvendësministri i Shëndetësisë, Klodian Rjepaj, ka pasur njohje me biznesmenin e kompanisë fituese të koncesionit të sterilizimit.

Kjo ndryshe nga sa dy të pandehurit kanë deklaruar.

Rjepaj dhe Rrapaj kanë përfunduar studimet së bashku në fakultetin e Mjekësisë në vitet 1991-1994.

Sipas hetimeve, biznesmeni përdorte makinën e ish-zëvendësministrit të Shëndetësisë për të dalë jashtë Shqipërisë.

Madje në dosje shkruhet se Rrapaj dilte jashtë vendit me makinën që drejtohej nga shoferi i zëvendësministrit.

Jo vetëm kaq, ai ka udhëtuar dhe me ish-ministrin e Shëndetësisë, Ilir Beqja.

“A.LL drejtor në kompaninë koncesionare Saniservice përfundoi studimet bashkë me Rrapaj e Rjepaj. Njohjen mes Rrapaj dhe Rjepaj e konfirmoi një studente tjetër e atyre viteve me inicialet D.N”.

Ndërkaq Gjykata e Posaçme Kundër Korrupsionit dhe Krimit të Organizuar ka lënë në fuqi të tetë masat e kërkuara nga Prokuroria e Posaçme, SPAK.

Një ditë më parë, SPAK ka lëshuar një mori urdhër-arrestesh, sa i takon një çështjeje tepër të nxehtë, e cila lidhet me dosjen e njohur si “Koncesioni i sterilizimit”, ku në pranga kanë përfunduar aktualisht ish-zëvendësministri i Shëndetësisë, Klodian Rjepaj, si edhe biznesmeni fitues i tenderit, Ilir Rrapaj.

I pari, i akuzuar për shpërdorim detyre dhe i dyti, për mashtrim me pasoja të rënda.

Rrapaj përftoi tenderin me vlerë 100 milionë euro, për ngritjen e një qendre sterilizimi në QSUT, e cila kurrë nuk mori jetë.

Megjithatë, të tjerë persona janë po ashtu të përfshirë në ngjarje.

Në arrest shtëpie, me urdhër të SPAK, janë lënë edhe drejtori ekonomik i Ministrisë, Saimir Kadiu, si edhe drejtoresha juridike, Marsela Serjanaj.

Ka ndërkohë edhe disa urdhra për detyrim paraqitje, ku përfshihet edhe Rektori i Universitetit të Mjekësisë, njëkohësisht shefi i kirurgjisë pranë QSUT, Arben Gjata.

Po ashtu, detyrim paraqitje ka edhe për shtetasit Pertef Mersini, Genc Burazeri dhe Naile Ajazi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.