Zëdhënësi i Bashkimit Evropian, Peter Stano, e ka mohuar se Bashkimi Evropian po heq dorë nga propozimi për normalizim të marrëdhënieve mes Kosovës dhe Serbisë, të cilin e mbështet Gjermania, Franca dhe SHBA-ja, ashtu siç tha kryeministri i Kosovës, Albin Kurti.
“BE-ja vazhdon të qëndrojë plotësisht pas këtij propozimi dhe inkurajon dyja palët që të bien dakord me tekstin, sapo të jenë të gatshme t’i dëshmojnë komunitetit ndërkombëtar se janë të afta të pranojnë zgjidhjet evropiane”, tha Stano, raporton N1.
“Tani është thelbësore që të dyja palët të shmangin përshkallëzimin, e kërkohet veprim i menjëhershëm nga dyja palët – Kosova të mos fillojë me shqiptimin e gjobave e Serbia të mos lëshojë targa të reja KM”.
Ai ka shtuar se “nuk mund të ketë negociata për normalizimin me kërcënim aktual të dhunës”.
Kurti pas takimit: S’kemi marrëveshje, fajet i ka BE’ja – Borrell hoqi dorë nga propozimi i vet
Ky reagim i Stanos vije pasi kryeministri i Kosovës, Albin Kurti, ka bërë fajtor Bashkimin Evropian, saktësisht shefin e diplomacisë së BE-së, Josep Borrell, për mos arritje të një marrëveshje këtë të hënë në Bruksel.
“Në propozimin që na kanë sjellur neve ka qenë edhe afati, marsi i vitit 2023. Ne po vijmë këtu për t’u marrë vesh për marrëveshje që arrihet para marsit. Borell hoqi dorë nga ky afat me keqardhje mund ta them, dhe nga propozimi i BE-së, po them me keqardhje sepse vetëm e kanë propozuar marsin e vitit 2023 dhe gjithashtu propozimi është i BE-së”.
Kurti ka sqaruar edhe se çfarë i ishte thënë në Paris në takim me Borell-in.
“Kur u takuam në Paris, Borell tha se propozimi nuk është franko-gjerman, por i BE-së. Në rregull pra, por sot ai hoqi dorë nga propozimi i BE-së. Unë jam i gatshëm që të vij këtu, të zhvillojë takime, gjithmonë me strukturën dhe rendin e njëjtë. Marrëveshja finale dhe çështje aktuale edhe si puna e këtyre targave, por nuk bën njëra pa tjetrën”.
Josep Borell, shefi i Diplomacisë së Bashkimit Evropian, ka dhënë një nga deklaratat më negative për Kosovën pas takimit të kryeministrit të Kosovës, Albin Kurti dhe presidentit të Serbisë, Aleksandër Vuçiç.
“Kishim një propozim”, tha Borell, “Presidenti Vuçiç e pranoi, kryeministri Kurti jo”.
“Për hir të transparencës më duhet të them se i vëmë para një propozim që do ta evitonte këtë situatë. Vuçiç e pranoi propozimin. Kurti nuk e pranoi. Rendi dhe ligji nuk duhet të shfrytëzohet si pretekst për eskalime”, deklaroi Borell.
Për këtë sjellje të palëve, deklaroi Borell, duke shtuar se veçanërisht për sjelljen e palës së Kosovës, do t’i informojë shtetet anëtare të Bashkimit Evropian.
“Unë do t’i informoj kolegët e mi nga shtetet anëtare për sjelljen e palëve dhe mungesën e respektit për obligimet ndërkombëtare dhe këtë po e them pikërisht për Kosovën”, shtoi Borell.
“E di tingëllon sinjal shumë negativ politik”, deklaroi shefi i politikë së jashtme të BE-së.
Por, vazhdoi ai “unë ua bëra të qartë se nëse keni synim BE-në do të duhej të silleshit ashtu”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
