Kompania Spotify ka njoftuar se po shkurton rreth 600 vende pune, pasi u bë kompania më e fundit e madhe e teknologjisë që pranoi se u zgjerua shumë shpejt gjatë pandemisë.
Bashkëthemeluesi dhe shefi ekzekutiv i saj, Daniel Ek, i ka thënë stafit në një postim në blog se platforma po redukton fuqinë punëtore me gjashtë për qind.
“Ashtu si shumë liderë të tjerë, shpresoja të mbaja erërat e forta nga pandemia dhe besoja se biznesi ynë i gjerë global dhe rreziku më i ulët ndaj ndikimit të një ngadalësimi të reklamave do të na izolonin”, ka thënë ai.
“Isha shumë ambicioz për të investuar përpara rritjes së të ardhurave tona”, ka vijuar Ek.
Shpenzimet operative të Spotify-t u rritën me dyfishin e shpejtësisë së të ardhurave të tij vitin e kaluar, pasi kompania investoi shumë në biznesin e saj të podcast-it.
Sakaq, kompania fiton para nga shërbimi i saj Premium, i cili përbën rreth 85 për qind të të ardhurave të saj, ndërsa pjesa tjetër vjen nga shërbimi i saj i mbështetur nga reklamat.
“Gjatë muajve të fundit kemi bërë një përpjekje të konsiderueshme për të frenuar kostot, por thjesht nuk ka qenë e mjaftueshme”, ka treguar Ek.
Po ashtu kompani si Amazon, Microsoft, Meta, Alphabet dhe kompania e software-ve të biznesit Salesforce kanë njoftuar shkurtime të konsiderueshme të vendeve të punës kohët e fundit.
Për këtë ata kanë përmendur një mjedis të pasigurt ekonomik dhe zgjerim të tepërt nën kufizimet e pandemisë kur pati një bum të kërkesës për produkte të lidhura me teknologjinë dhe shërbimet.
Ndërkohë, Spotify ka 456 milionë përdorues në muaj.
Vitin e kaluar, artisti numër 1 më i transmetuar në platformë globalisht ishte Bad Bunny, i ndjekur nga Taylor Swift, Drake, The Weeknd dhe BTS.
Ek po ashtu i ka thënë stafit se Dawn Ostroff, kreu i përmbajtjes dhe reklamave, po largohej pas më shumë se katër vjetësh në kompani.
Ostroff ndihmoi në formimin e biznesit të podcast-it dhe e drejtoi atë përmes reagimeve të kundërta rreth shfaqjes së Joe Rogan për intervistimin e të ftuarve që ndanë teoritë e konspiracionit ndaj COVID-it.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
