Specialja ia ul dënimin e Mustafës në 15 vjet burgim

Paneli i Gjykatës së Apelit të Dhomave të Specializuara të Kosovës ia ka ulur dënimin ish-komandantit të UÇK-së, Salih Mustafës nga 22 vjet burgim në 15 vjet burgim.

Gjykata e Apelit në kuadër të Gjykatës Speciale në Hagë ia ka shqiptuar Mustafës një dënim të unifikuar prej 15 vjetëve burgim, duke llogaritur këtu edhe kohën e kaluar në paraburgim.

“Më 10 shtator 2024, Paneli i Gjykatës së Apelit në çështjen Prokurori i Specializuar kundër Salih Mustafës shqiptoi dënimet individuale ndaj z. Mustafa për krimet e luftës të ndalimit arbitrar, torturës dhe vrasjes së paligjshme prej tetë, 13 dhe 15 vjet burgim si dhe ia shqiptoi dënimin e njësuar prej 15 vitesh burgim, duke llogaritur dhe kohën në paraburgim”, thuhet në njoftim.

Mustafa u shpall fajtor më 16 dhjetor të vitit 2022 dhe iu shqiptua dënim prej 26 vjetëve burgim.

Mustafa e apeloi vendimin e shkallës së parë dhe dënimin e dhënë nga Trupi Gjykues.

Apeli ia kishte ulur dënimin Mustafës nga 26 vjet në 22 vjet burgim.

Ndërkohë Mustafa apeloi edhe në Gjykatën Supreme të Dhomave të Specializuara.

Gjykata e anuloi vendimin prej 22 vjetëve burgim dhe e ktheu rastin në rivendosje.

Mustafa është akuzuar për ndalim arbitrar, trajtim mizor, torturë dhe vrasje të paligjshme.

Megjiathë ai u dënua me burgim për vrasje të paligjshme, ndalim arbitrar dhe torturë.

Ai u shpall i pafajshëm për trajtim mizor.

Këto krime u tha se janë kryer në kompleksin e ndalimit në Zllash në Kosovë, në prill të vitit 1999.

Sipas aktakuzës, Salih Mustafa, i njohur si ‘komandant Cali’, ka qenë komandant i njësitit gueril BIA, njësit brenda Zonës Operative të Llapit të Ushtrisë Çlirimtare të Kosovës.

Specialja tha se qendra e ndalimit në Zllash ishte kontrolluar nga Mustafa.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.