Sondazhi: LVV pëson rënie, Kurti ndiqet nga Abdixhiku si lideri më i pëlqyeshëm

Në një sondazh të publikuar në Klan Kosova nga Instituti “PIPOS”, partitë opozitare dalin shumë më mirë në matjen e opinionit publik, kurse Lëvizja Vetëvendosje, e cila vazhdon të proklamojë të arriturat e saj në Qeveri, ka pësuar rënie.

Në pyetjen: “Nëse do të mbasheshin sot zgjedhjet parlamentare, për cilën parti do të votonit?”, 35.5 përqind e qytetarëve do të votonin Lëvizjen Vetëvendosje (LVV).

Ndërkaq, 22.2 përqind e qytetarëve kanë bërë të ditur se do të votonin Lidhjen Demokratike të Kosovës (LDK) kurse 21.5 përqind do të votonin për Partinë Demokratike të Kosovës (PDK).

Aleanca për Ardhmërinë e Kosovës sillet rreh 6 përqindëshit kundrejt Nismës Social-Demokratike e cila vazhdon të mbetet në prag me rreth 2.4 përqind.

Vetëm 1 përqind e qytetarëve sipas hulumtimit do të votonin për Listën “Guxo” ndërsa 0.4 përqind do të votonin për Aleancën Kosova e Re (AKR).

Por, 7.4 përqind e qytetarëve që ishin pjesë e sondazhit kanë thënë se nuk do të kishin votuar fare, 2.4 përqind kanë refuzuar të japin mendim për dallim nga 0.6 përqind që kanë thënë se do të votonin ndonjë parti tjetër.

Sa i përket pyetjes: “Cili nga liderët është më i pëlqyeshëm nga ju?”, shefi i LVV-së, Albin Kurti prinë me 26.7 përqind, pasuar nga Lumir Abdixhiku i LDK-së me 20 %.

Lideri i partisë më të madhe opozitare, Memli Krasniqi, vjen i treti si më i pëlqyeshmi me 17 përqind, duke lënë pas presidenten Vjosa Osmani me 11.8 përqind.

Ramush Haradinaj, kreu i AAK-së, renditet pas me një nivel pëlqyeshmëri prej 7.2 përqind ndërsa për opsionin “asnjëri” u përcaktuan 9.8 përqind.

Fatmir Limaj pëlqehet dukshëm më shumë sipas sondazhit sesa Mimoza Kusari apo Behgjet Pacolli.

Kjo matje e opinionit publik është realizuar me 1 mijë respondentë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.