Sondazhi i Albanian Post – Ekskluzive: Ardian Gjini bindshëm i pari në Gjakovë, Kusari-Lila ngecën

Ardian Gjini mund ta ruajë ulësen e kryetarit të Komunës së Gjakovës dhe këtë herë fitoren do ta ketë edhe më të lehtë se para katër vjetësh, nëse ai mban epërsinë që ka krijuar në raport me kandidatët e tjerë deri në ditën e zgjedhjeve me 17 tetor.

Rezultatet që dalin nga sondazhi i realizuar nga Albanian Post dhe Institutit Source, me të dhëna nga terreni të fund-shtatorit, Ardian Gjini, prinë bindshëm me 50.7% të votave.

Kundër-kandidatja më serioze në garë me Gjinin, është ish-kryetarja e Gjakovës, e cila garon në siglën e Lëvizjes Vetëvendosje, Mimoza Kusari-Lila.

Megjithatë, edhe Kusari-Lila është poshtë në raport me Gjinin e Aleancës për Ardhmërinë e Kosovës, me vetëm 34.3% të votave.

I treti në këtë komunë është Teki Shala i Lidhjes Demokratike të Kosovës me 7.1% të votës së përgjithshme, ndërsa Arbnesha Kuqi e Partisë Demokratike është në shifrën prej 2.9%.

Kurse kandidati i Partisë Shqiptare Demokristiane të Kosovës, Ferdinand Kolaj, në këtë sondazh del me 5% nga vota totale.

Në pyetjen tjetër të sondazhit se në zgjedhjet e 17 tetorit kënd do ta votoni nga partitë politike në zgjedhje, Aleanca për Ardhmërinë e Kosovës përsëri del e para, megjithatë në përqindje më të vogël se vetë kryetari Gjini.

AAK, sipas sondazhit të Albanian Post, ka 46.4%, derisa e dyta është Lëvizja Vetëvendosje me 33.6%, që është brenda përqindjes së njëjtë që ekziston edhe për kandidaten Kusari-Lila.

E treta, por mbi votë të kandidatit të vetë, është Lidhja Demokratike e Kosovës me 9.3%.

Edhe Partia Demokratike e Kosovës në Gjakovë përformon më mirë se kandidatja për kryetare Kuqi. PDK megjithatë mbetet në shifra fare të vogla prej 2.9%.

Për opsionin “tjetër” janë përgjigjur 5.7 e respodentëve që korrespondon edhe me votën që shkonte për kandidatin e PSHDK-së, Kolaj.

Kurse, si jo zakonisht nëpër sondazhe, “të papërcaktuar”, ka pasur shumë pak me 0.7% të të anketuarve. Kur opsioni “të papërcaktuar” është në shifra të vogla në sondazhe, atëherë kjo nënkupton se ndryshime të mëdha në rezultatin përfundimtar zgjedhor është shumë vështirë të ketë, për arsyen se votuesi tashmë e ka ndarë mendjen se për kë do të votojë.

Po ashtu, përkundër se votë jo e madhe, të pavendosurit deri në fund me shumë gjasë t’i shkojnë Gjinit, sepse sipas kryqëzimeve del se 50% e të pavendosurve janë përgjigjur se janë të kënaqur me punën e institucioneve komunale.

Meqë anketimi është realizuar pas ndërhyrjes së Njësiteve Speciale në Veri sondazhi ka përmbajtur pyetje edhe për këtë vendim të Qeverisë.

Në Gjakovë, qytetarët janë të ndarë pothuajse në dysh, kur pyeten se a e ka bërë Qeveria aksionin në veri vetëm për shkak të fushatës politike.

48.5% përgjigjen se “pajtohen plotësisht”, derisa 45% thonë se “nuk pajtohen”. Janë një përqindje prej 3.6% që kanë përgjigje asnjanëse, derisa 2.9% refuzojnë të përgjigjen.

Por, në përgjithësi nga sondazhi i AP dhe Institutit Source, kuptohet se aksioni në veri, edhe nëse është bërë për fushatë, ka pasur fare pak ndikim në përzgjedhjet politike të qytetarëve dhe çfarëdo vendimi në të ardhmen, nuk do të krijojë ndonjë efekt po ashtu.

Janë 92.2% që thonë se nuk do të ndikojë tek ata që të votojnë pro qeverisë, nëse ajo largon njësitet nga Veriu dhe gjithashtu në pyetjen tjetër, deklarohen 72% se nuk ndikon as që të votojnë kundër.

Kurse si dy arsyet kryesore për të vendosur se kujt do t’ia japin besimin në zgjedhje, qytetarët kanë përmendur kandidatin e partisë së caktuar për kryetar dhe gjithashtu programin.

Si ishte dhe si është? Krahasim me zgjedhjet e kaluara lokale dhe nacionale

Edhe në zgjedhjet e fundit lokale në Kosovë, ato të vitit 2017, në Gjakovë gara ishte zhvilluar mes këtyre dy kandidatëve – Ardian Gjinit e Mimoza Kusari-Lilës.

Lila që atëherë garonte me partinë e saj Alternativa, kishte dalë e dyta me 32.10% duke u mposhtur nga Gjini me 39.88%.

Ndërsa Lëvizja Vetëvendosje atëkohë në Gjakovë garonte me Driton Caushin, i cili kishte arritur të sigurojë 12.87% të votave në këtë komunë.

Por, meqë asnjë nga kandidatët nuk arriti mbi gjysmën e votës së përgjithshme, ata shkuan në raundin e dytë – në balotazh.

Gara ishte tejet e ngushtë. Gjini fitoi me 2847 vota më shumë se Kusari-Lila. Ai pati arritur në 53.46%, derisa kundër-kandidatja 46.54%.

Zgjedhjet Parlamentare

Në zgjedhjet e fundit parlamentare, të mbajtura po këtë vit me 14 shkurt, Lëvizja Vetëvendosje në Gjakovë, si në shumicën e komunave të Kosovës, pati përmbysur gjithçka.

Vetëvendosja në këto zgjedhje doli e para në këtë komunë me 55.25% të votave. AAK-ja, që kishte kryetar komune Gjinin, kishte dëshpëruar, duke dalur e dyta me vetëm 23.61%.

Nëse krahasohen këto shifra të partive, me ato të sondazhit të realizuar nga Albanian Post – përkundër se preferencat e qytetarëve dallojnë shumë nga zgjedhjet lokale në ato parlamentare – del se Vetëvendosje ka një rënie prej 21.65%, derisa në anën tjetër AAK-ja ka rritje 22.79%.

LDK-ja është me luhatje fare të vogël nga zgjedhjet e kaluara, duke shënuar rezultat diçka më të mirë – nga 8.4% sa ishte në zgjedhjet parlamentare në 9.3% në këtë sondazh.

Kjo nënkupton – gjithmonë duke analizuar me numrat e sondazhit – se rreth 20% e votës së Vetëvendosjes ka kaluar te Aleanca për Ardhmërinë e Kosovës.

Gjithsesi, deri me datën e zgjedhjeve, 17 tetor, numrat mund të lëvizin, por duke marrë parasysh distancën e shkurtër të marrjes së të dhënave nga dita e zgjedhjeve dhe metodës së përdorur, marzha e gabimit është vetëm 1.5%.

Metoda e Sondazhit

Hulumtimi është realizuar sipas metodës së rastit, ku së pari është identifikuar numri i përafërt i popullatës në komunën e caktuar dhe rrjedhimisht edhe numri i anketave që duhet bërë në atë komunë.

Pastaj është caktuar raporti i anketave që duhen realizuar në viset rurale dhe urbane të komunës, në mënyrë që të reflektohet përpjesëtimi real brenda popullatës së komunës. Përfundimisht, janë caktuar pikënisjet (lokacionet) e sakta ku do të bëhen anketat.

Numri i anketave në vendbanimet e komunave janë bërë në proporcion me përqindjen e përafërt të banorëve të secilit vendbanim brenda popullatës në atë Komunë. Në këtë konkludim është ardhur pas vlerësimit të listave të KQZ-së  për zgjedhjet e vitit 2021.

Sipas metodologjisë së hulumtimit, anketat e caktuara për një lokalitet realizohen në grup prej 5 anketave (që quhet pikënisje). Një gjë e tillë mundëson përcaktimin e identiteteve të lokaliteteve të ndryshme brenda një vendbanimi apo komune. Kështu, një pikënisje mund të jetë  jë rrugë e caktuar, ku anketuesit duhet bërë një anketë në çdo të dytën shtëpi, të cilat gjenden në njërën anë të kësaj rrugë. Anketuesit duhet ta bëjnë anketën me personin që e ka datëlindjen më së afërmi me ditën e anketimit. Kjo metodë është dëshmuar të ketë saktësi të lartë statistikore.

Puna në terren ka zgjatur  6 ditë, prej 24 deri me 29 shtator 2021. Me datën 30 shtator edhe 1, 2 tetor, është realizuar kontrolli logjik i pyetësorëve si dhe kontrolli i kualitetit të punës së anketuesve në terren. Pas kontrolleve janë përpunuar të dhënat.

Të hënë vazhdon publikimi i rezultateve të sondazhit për një tjetër komunë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.