Sondazhi i Albanian Post – Ekskluzive: Arben Vitisë mund t’i duhet vetëm një raund, Uran Ismaili befasia e Prishtinës

Arben Vitia, kandidati i Lëvizjes Vetëvendosje për kryetar në Komunën e Prishtinës, përkundër se me fare pak fushatë dhe atë të nisur shumë vonë, i ka gjasat më të mëdha që të fitojë në Zgjedhjet Lokale të 17 tetorit dhe atë me vetëm një raund.

Sipas sondazhit të fundit të realizuar nga Albanian Post dhe Institutit Source, me të dhëna të mbledhura në terren në fund të muajit shtator, Vitia i prinë garës në Prishtinë me 48.2% nga numri i përgjithshëm i respodentëve në këtë matje.

I dyti, që mund të cilësohet edhe befasi, është kandidati i Partisë Demokratike të Kosovës, Uran Ismaili, me 22.3%.

Vetëm në vendin e tretë, dhe shumë nën Ismailin, del në këtë sondazh, Përparim Rama, arkitekti që pranoi ftesën e Lumir Abdixhikut, për të garuar nën siglën e Lidhjes Demokratike të Kosovës në këto zgjedhje.

Rama ka vetëm 11.3% të votës së përgjithshme.

I katërti është Daut Haradinaj i Aleancës për Ardhmërinë e Kosovës, që qëndron në shifrat prej 7.4% dhe krahasuar me përqindjet me të cilat historikisht përformon AAK-ja në Prishtinë, rezultati i Haradinajt është shumë i mirë.

Dy kandidatët tjerë, Gëzim Mehmeti i Aleancës Kosova e Re dhe Avni Çakmaku i Partisë Fjala, janë me nga 0.4% që të dy, derisa 10% të të anketuarve janë shprehur se ende janë të pavendosur se për kë do të votojnë.

Vota për kandidatët në qytet dhe fshatra

Pas kryqëzimeve në mes të votave të kandidatëve dhe vendbanimeve, sipas rezultateve të sondazhit të Albanian Post, kandidati i Vetëvendosjes Arben Vitia, përformon në fshatra shumë më mirë se kandidatët e tjerë.

Po të shkëputet vetëm vota në fshatra, Vitia ka përkrahje prej 62%. Edhe kandidati i LDK-së, Përparim Rama, është diçka më mirë në zonat rurale sesa në qytet. Ai ka përkrahje prej 12% në fshatra.

Derisa Uran Ismaili, votat kryesore i ka në qytet. Ai, po të llogariteshin vetëm votat e qytetit, do të dilte me 22.8%, kurse po të merren vetëm votat në fshat mbetet në 20%.

Vetëvendosje e para edhe si parti

Njëjtë si kandidati Vitia, madje pak më mirë edhe se ai, është Lëvizja Vetëvendosje si parti në Prishtinë.

Të pyetur se cilën parti do ta votoni në Zgjedhjet Lokale të 17 tetorit, 48.6% të qytetarëve të anketuar kanë zgjedhur Vetëvendosjen.

E dyta, dhe pak nën kandidatin e vet, është Partia Demokratike e Kosovës, me 21.6% të votave, kurse Lidhja Demokratike e Kosovës, për befasi, ka përkrahje vetëm prej 11.7%.

Ndërsa vota e Aleancës në Prishtinë është identike si e kandidatit Haradinaj, 7.4%.

Të papërcaktuar se për cilën parti do të votojnë janë 7.8%, kurse refuzojnë të japin përgjigje 2.2% dhe 0.7% kanë preferuar parti të tjera.

Vota për partinë në qytet dhe fshatra

Edhe Vetëvendosje si parit, njëjtë si kandidati Vitia, ka përkrahje shumë më të madhe në fshatra. Po të merret vota pro Vetëvendosjes dhe të kryqëzohet me vendbanime rurale, atëherë LVV ka 64% të votave.

Njëjtë edhe LDK si Rama mbështetet më shumë në fshatra, kurse PDK e Uran Ismailit votën më të madhe e ka në qytet.

AAK gjithashtu votat pothuajse krejtësisht i ka në qytet.

Nga ky kryqëzim del se të papërcaktuarit janë kryesisht votuesit e qytetit, derisa në fshatra ka shumë më pak të papërcaktuar.

Sa i përket nivelit të kënaqësisë me institucionet komunale tek të pavendosurit, shifrat janë se 23.6% shprehën të kënaqur me punën e qeverisë, të pakënaqur janë 34.8%, derisa “ashtu-ashtu” janë përgjigjur 41.8%.

Megjithatë, meqë qeveria aktuale në krye me Shpend Ahmetin nuk janë në garë, niveli i kënaqësisë së qytetarëve me institucionet komunale, tek te pavendosurit, nuk është se e afekton ndonjë konditat as negativisht, as pozitivisht.

Përveç, kandidatin e Aleancës Kosova e Re, meqë kjo parti ishte në bashkëqeverisje në Prishtinë.

Të anketuarit si arsye të parë për të dhënë votën kanë zgjedhur kandidatin e partisë për kryetar të Komunës, më pas arsye e dytë është mosbesimi ndaj partisë tjetër, lideri i partisë dhe arsye e katërt është renditur programi.

Marzha e gabimit në këtë sondazh të Albanian Post dhe Institutit Source është 1.5%.

Si krahasohen këto rezultate te sondazhit me zgjedhjet e kaluara lokale dhe nacionale?

Nëse Lëvizja Vetëvendosje i fiton zgjedhjet në Prishtinë, atëherë kjo do të ishte hera e tretë radhazi për këtë parti. Por, në dy palë zgjedhjet e kaluara Vetëvendosje garonte me një kandidat si Shpend Ahmeti, i cili ka popullaritet të madh edhe vetë si politikan.

Por, në këto zgjedhje Ahmeti nuk garon dhe kjo përbën një nga karakteristikat e garës në Prishtinë – fakti që kryetari aktual nuk është në garë.

Madje, asnjë nga kandidatët e tanishëm për kryetarë të Prishtinës, nuk kanë garuar më parë për këtë pozitë.

Arben Vitia e Uran Ismaili në Zgjedhjet Lokale të vitit 2017 kishin garuar, por për asamble komunale. Të dy patën fituar. Vitia kishte diku afër 2000 vota, derisa Ismaili afër 1000 – të mjaftueshme këto për një ulëse në asamble.

Ndërsa për Përparim Ramën e LDK-së kjo do të jetë hera e parë që merr pjesë në zgjedhje, të çfarëdo niveli, pasi ai është një njeri jashtë strukturave të partisë, i ardhur me ftesë të kryetarit Abdixhiku, për të garuar për kryetar.

Kurse Daut Haradinaj gjithmonë ka garuar në nivel nacional dhe vota e tij kryesisht vjen nga qytetet e Dukagjinit, megjithatë, në zgjedhjet e parakohshme parlamentare të 14 shkurtit 2021, Haradinaj në komunën e Prishtinës kishte marrë 1 mijë e 266.

Zgjedhjet Parlamentare

Zgjedhjet e fundit për Kuvendin e Kosovës Lëvizja Vetëvendosje kishte arritur rezultat të jashtëzakonshëm në Prishtinë. LVV pati fituar në këto zgjedhje 65.13% të votave në Komunën e Prishtinës, duke e lënë të dytën LDK-në me vetëm 16.2%. Kurse PDK-ja atëherë u nda me 11.7%.

Në këto gara, Vitia e Ismaili garonin si kandidat për deputetë në partitë e tyre. Vitia ishte një nga më të votuarit në Vetëvendosje. Ai u votua 107 mijë e 858 herë në nivel vendi dhe nga këto vota 30 mijë e 793 ishin vetëm nga komuna e Prishtinës.

Në anën tjetër edhe rezultati zgjedhor i Ismailit brenda PDK-së ishte shumë i mirë. Ai ishte deputeti më i votuar pas bartësit të listës. Ismaili në nivel të Kosovës, ishte votuar 26 mijë e 716 herë, derisa edhe në Prishtinë ishte më i votuari nga kandidatët për deputet dhe vinte menjëherë pas bartësit të listës, me 5 mijë e 466 vota.

Metoda e Sondazhit

Hulumtimi është realizuar sipas metodës së rastit, ku së pari është identifikuar numri i përafërt i popullatës në komunën e caktuar dhe rrjedhimisht edhe numri i anketave që duhet bërë në atë komunë.

Pastaj është caktuar raporti i anketave që duhen realizuar në viset rurale dhe urbane të komunës, në mënyrë që të reflektohet përpjesëtimi real brenda popullatës së komunës. Përfundimisht, janë caktuar pikënisjet (lokacionet) e sakta ku do të bëhen anketat.

Numri i anketave në vendbanimet e komunave janë bërë në proporcion me përqindjen e përafërt të banorëve të secilit vendbanim brenda popullatës në atë Komunë. Në këtë konkludim është ardhur pas vlerësimit të listave të KQZ-së  për zgjedhjet e vitit 2021.

Sipas metodologjisë së hulumtimit, anketat e caktuara për një lokalitet realizohen në grup prej 5 anketave (që quhet pikënisje). Një gjë e tillë mundëson përcaktimin e identiteteve të lokaliteteve të ndryshme brenda një vendbanimi apo komune.

Kështu, një pikënisje mund të jetë  jë rrugë e caktuar, ku anketuesit duhet bërë një anketë në çdo të dytën shtëpi, të cilat gjenden në njërën anë të kësaj rrugë. Anketuesit duhet ta bëjnë anketën me personin që e ka datëlindjen më së afërmi me ditën e anketimit.

Kjo metodë është dëshmuar të ketë saktësi të lartë statistikore.

Puna në terren ka zgjatur  6 ditë, prej 24 deri me 29 shtator 2021. Me datën 30 shtator edhe 1, 2 tetor, është realizuar kontrolli logjik i pyetësorëve si dhe kontrolli i kualitetit të punës së anketuesve në terren. Pas kontrolleve janë përpunuar të dhënat.

Këtu mund të shihni rezultatet për Gjakovën.

Këtu mund të shihni rezultatet për Prizrenin.