Sllovakia zgjedh pro-rusin Peter Pellegrini

Në zgjedhjet më të pasigurta dhe më të luftuara të 25 viteve të fundit, Sllovakia më në fund ka vendosur se cilën anë të mbajë.

Nga sot presidenti i ri i republikës është Peter Pellegrini, lider i partisë në pushtet “Hlas-SD” të udhëhequr nga Kryeministri nacionalist pro-rus, Robert Fico.

Pellegrini mundi në raundin e dytë pro-evropianin Ivan Korcok, ministër i Jashtëm për periudhën dyvjeçare 2020-2022, me 54.4% kundrejt 45.6% të votave dhe tani është e lehtë të parashikohet se ekzekutivi do të ketë në dorë për pesë vitet e ardhshme, një president që nuk do të kundërshtojë atë që vëzhguesit e përkufizojnë si “orbanizim” të Sllovakisë.

Në vend të kësaj do të mbështesë hapat e ardhshëm të Ficos, të cilat ndoshta do ta largojnë Bratislavën edhe më shumë nga Evropa dhe do ta bëjnë të vështirë mbështetjen e Bashkimit për Ukrainë.

I vetëdijshëm për shqetësimin ndërkombëtar për pozicionet e Ficos, 48-vjeçari Pellegrini argumentoi se vota “nuk ka të bëjë me drejtimin e ardhshëm të politikës së jashtme” të Sllovakisë.

“Unë garantoj se do të vazhdojmë të jemi një anëtar i fortë i BE-së dhe të NATO-s”.

Presidenca në Sllovaki është kryesisht ceremoniale, por kreu i shtetit gjithmonë mund të vërë veton ndaj ligjeve dhe të emërojë zyrtarë kryesorë, duke rezultuar në një pengesë – ose mbështetje – për zgjedhjet e Ficos.

Sipas kritikëve të qeverisë, Fico po ndjek hapat e Orbanit në drejtësi, media dhe marrëdhëniet – shumë “të relaksuar” – me Putinin.

Në detyrë që nga tetori i kaluar, qeveria e përbërë nga partia Smer e Ficos, “Hlas” e Pellegrinit dhe formacioni i vogël i ekstremit të djathtë “Sns” ka ndaluar ndihmën ushtarake shtetërore për Ukrainën.

Pellegrini ishte ministër në qeveritë e mëparshme të Ficos dhe madje e zëvendësoi atë në krye të qeverisë në vitin 2018.

Megjithëse ishte rival i tij për një periudhë, në një debat televiziv gjatë fushatës zgjedhore ai pranoi: Unë po kandidoj për të shpëtuar qeverinë e Robert Ficos.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.