Skena më tronditëse e “The Last of Us” nuk është ajo që mendoni ju

Spektakli i fundit televiziv i transmetuar nga gjigandi amerikan, HBO, “The Last of Us’, e paraqet botën në një skenar apokaliptik, ku për shkak të një pandemie fungale të ngjitshme përmes kafshimeve, njerëzit kthehen në zombi të mirëfilltë dhe mbijetesa, bëhet objektivi i vërtetë i gjithë ngjarjeve që rrethojnë personazhet kryesore, Ellie dhe Joel.

Skenat e forta të zhanrit horror, me pamje tronditëse të njerëzve të deformuar fizikisht për shkak të modifikimit që infektimi fungal i bën, janë tejet shqetësuese për shikuesin, pa diskutim.

Për dikë që nuk është mësuar me to madje, mund të hamendësohet se mbyllja e syve apo shikimi tutje, janë pjesë e eksperiencës së shikimit të serialit televiziv javor.

Nuk mungojnë në fakt këto skena në gjithë rrjedhën e historisë.

Por duhet theksuar, se as të shumta nuk janë, duke marrë parasysh të tjera spektakle, të cilat e kultivojnë veten në këtë zhanër.

Në fakt, skena më tronditëse dhe tmerruese e “The Last of Us” nuk është ajo që mendohet gjerësisht nga publiku dhe nuk përfshin asnjë zombi në të.

Përkundrazi, është ndoshta skena më njerëzore dhe lidhet me minutat e para të serialit.

Ajo zhvillohet në një skript ku dy epidemiologë, janë të vendosur përballë në një debat televiziv, ku moderatori i emisionit i pyet mbi rreziqet potenciale të një shfarosjeje krejtësore të njerëzimit.

I pari epidemiolog, sigurisht e vë theksin te viruset e ndryshme, infektimet, bakteret, ku ngjason shumë sikur po flet në planin e një pandemie, të cilën sapo e kemi kaluar.

Mirëpo është epidemiologu i dytë, ai i cili e trondit shikuesin më së shumti, kur deklaron se as viruset, as bakteret dhe asnjë infektim potencial nuk e cenon njerëzimin, sepse në fund jemi ne që fitojmë.

Kështu, mes të qeshurash, ai pyetet se cili mendon se rreziku potencial për shfarosjen është dhe përgjigja vjen e papritur, kur ai bën me dije se një pandemi fungale, mund të jetë ajo fatalja për homo sapiens-in.

Të gjithë e qeshin atë, duke ditur se kërpudhat nuk i durojnë temperaturat e larta brenda trupit të njeriut, pavarësisht se në gjallesa të tjera, është e vërtetuar se ato mund të marrin kontrollin e mendjes së gjallesës (kryesisht insekteve) për të mbijetuar vetë, duke e “zombifikuar” qenien e gjallë dhe duke e vrarë përfundimisht.

Mirëpo, një aspekt për t’u marrë parasysh, është ngrohja globale, të cilën ai e përmend.

“Paramendoni sikur temperaturat në Tokë të ngrohen aq, sa të krijojnë një evoluim fungal me mundësinë për të mbijetuar në temperatura të larta dhe rrjedhimisht, ta marrin kështu nën kontroll mendjen e njeriut”.

I kuriozuar, moderatori i emisionit e pyet se çfarë ndodh në këtë rast dhe përgjigja, është rrëqethëse nga epidemiologu: Ne humbasim!

Vetë vërtetësia e këtij dialogu tre-minutësh që në fillim të serialit, e bën atë tmerrues dhe përfshirës për të gjithë, pasi ka vërtetë shanse që një mutacion i tillë të ndodhë dhe në atë rast, asnjë kurë nuk është e mundur.

Mbijetesa, vërtetë mund të kthehet në objektiv për njeriun, jo vetëm figurativisht dhe të fundit nga, duhet të gjejnë dritën në fund të tunelit…nëse ka një të tillë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.