Skandali Berishaj, PSD i dërgon lavatriçe Qeverisë

Partia socialdemokrate përmes një aksioni simbolik para ndërtesës së Qeverisë, ka kritikuar këtë të fundit për neglizhencën në raport me skandalin e ambasadorit të Kosovës në Kroaci, Martin Berishaj, emri i të cilit u lakua ditëve të fundit në një skandal për pastrim parash në Slloveni.

Aktivistët e PSD-së të cilët kanë bllokuar hyrjen kryesore të Qeverisë, me tri lavatriçe të mbushura me para, e të cilat simbolizojnë shpëlarjen e parave, kanë thënë se qëllimi këtij aksioni është paraqitja në mënyrë figurative aktivitetet e kundërligjshme që po ndodhin në Kosovë, ditëve të fundit.

Sipas Zgjim Hysenit, aktivist i PSD-së, janë bërë një javë që kur është raportuar për skandalin e ambasadorit Berishaj, ndërsa institucionet dhe eprorët e ambasadorit po heshtin.

“Ambasadori Berishaj ka hapur një kompani në Mal të Zi me vetëm vetën e tij punëtorë, 600 mijë euro në xhirollogari e më pastaj në strajcë, prejardhja e pareve është Beogradi, na e dimë që kushdo që bënë tregti me Beogradin pavarësisht cila është kompania është tepër vështirë mos me rra nën rrjetën e monopolit e të ashtuquajturës, mafi energjetike e Ballkanit”, ka thënë Hyseni.

Më tej, Hyseni ka thënë se vetëm mos-deklarimi i kompanive të Berishajt në Administratën Tatimore të Kosovës ka mjaftuar që ai të shkarkohet duke aluduar kështu se Kryeministri, Albin Kurti dhe Presidentja, Vjosa Osmani janë të lidhur direkt me skandalin e ambasadorit.

“Berishaj i paska katër nënshtetësi, ai del të jetë edhe ambasador, profesor, por në të njëjtën kohë edhe sekser. Kjo nuk shkon. Krejt kjo aferë nuk është e izoluar me emrin e personalitetin e një ambasadori. Secila ditë që kalon dhe ambasadori Berishaj vazhdon me qenë në detyrë, ne kemi drejtë me besu që kryeministri dhe presidentja janë të lidhur direkt me këtë punë”, ka thënë Hyseni.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.