Skandal: Gjendet mi i ngordhur në produktet e “Apetit Group”, fillon inspektimi i fabrikës së mishit të kësaj kompanie, bllokohet një sasi e suxhukut

Në produktet e mishit të kompanisë “Apetit Group”, saktësisht në suxhukun që prodhohet në fabrikat e mishit të kësaj kompanie, është gjetur një “mi i ngordhur”.

Rastin fillimisht e ka raportuar një qytetar në policinë e Kosovës, i cili ka treguar se në paketimin e suxhukut nga “Apetit”, të blerë në një market të kompanisë Inter Ex (Proex SHPK) në Vushtrri, ka gjetur një mi të ngordhur.

Policia më pas ka njoftuar Agjencinë e Ushqimit dhe Veterinarisë me datën 25 gusht.

Në përgjigjen që Albanian Post ka pranuar nga Agjencia e Ushqimit dhe Veterinarisë kanë konstatuar se në produktin që kanë inspektuar, kanë konfirmuar se bëhet fjalë për paketim të kompanisë “Apetit”.

“Është vërejtur qartë se produkti është prodhuar nga subjektit operatori ekonomik Apetit. Në një pjesë të ndarë të produktit në pamje vizuale është konstatuar se është një mi i ngordhur. Ekipi inspektues menjëherë me prezencën e policisë ka nisur ndërmarrjen e veprimeve për gjurmim të rastit”, thuhet në përgjigjen e AUV-ut për Albanian Post.

Është e njëjta kompani që ka tenderë nga institucionet e Kosovës për të furnizuar me produkte të mishit Qendrën Klinike Universitare të Kosovës, të gjitha spitalet e Kosovës, të gjitha Qendrat e Shëndetit Mendor, Qendrën Studentore të Kosovës, burgjet e Kosovës dhe shumicën dërrmuese të komunave të Kosovës.

Kompania “Apetit Group” dhe “Riki” – me të njëjtit pronarë – të kontraktuara nga shteti për të furnizuar QKUK-në dhe të gjitha spitalet e Kosovës me mish

Albanian Post në të kaluarën ka raportuar për të gjithë këta tenderë të fituar nga “Apetit”, kompani e njëjtë që ishte zbuluar nga mediat në Shqipëri se si mishin e blerë në Brazil e eksportonte për në Shqipëri si “mish i freskët i Kosovës”.

Në përgjigjen e AUV-it për AP-në është njoftuar gjithashtu se “inspektorët në ekip të përbashkët me policinë kanë ushtruar kontroll të menjëhershme tek marketi, Proex SHPK (Interex) Vushtrri”.

“Ne ekspozim ne shitje është gjetur një sasi prej 25.14 kg suxhuk i përpunuar dhe paketuar nga subjekti Apetit me nr. lloti 216-1/254; dt. paketimi 09.08.2024 dhe skadence 23.09.2024”, tregojnë nga AUV.

E njëjta sasi, siç sqarojnë nga Agjencia e Ushqimit “menjëherë është larguar nga shitja”.

Po ashtu, “në kontroll të depos se marketit është gjetur një sasi tjetër prej 280 kilogramëve. E  cila ka qenë në depo të ruajtjes, me nr. lloti 233-1/24, dt. paketimi 21.08.2024 dhe skadimi 05.10.2024. Të njëjtat janë ndaluar për ekspozim dhe shitje deri ne kryerjen e gjurmimit të plotë ne lidhje me rastin”.

Njoftohet se “nga subjekti Proex SHPK janë mbledhur si dëshmi të dhënat nga faturat e furnizimit me ketë produkt nga fabrika e përpunimit të mishit Apetit. Gjate periudhës nga data 16.08.2024 deri 25.08.2024 janë furnizuar dy here me ketë produkt ne sasi totale 250 kilogramëve”.

Siç kanë treguar për Albanian Post nga AUV-i, të nesërmen, me datën 26 gusht të këtij viti, e hëne, “Inspektorati Veterinar i AUV-së ka ushtruar kontroll të detajuar në Fabrikës e përpunimit të mishit, ne lidhje me gjetjen e dëshmive apo fakteve të cilat mund të japin argumente për të vërtetuar apo mbështetur dyshimin e ngritur”.

“Në kontroll fokusi qendrorë ka qen kontrolli i higjienës dhe masave mbrojtëse të vetë kontrollit nga operatori ekonomik ne lidhje me parandalimin e kontaminimit te produkteve sidomos me agjent fizik”, sqaron përgjigja e AUV.

AUV-i ka bërë të ditur edhe se ka kërkuar “që dy lotët e produktit suxhuk të gjetura në marketin ku pretendon se ka blerë konsumatorja. Të tërhiqen nga tregu deri ne marrjen e vendimit përfundimtar pas hulumtimit të plotë”.

Gjithashtu, “janë marr edhe 12 mostra për testime mikrobiologjike dhe fiziko kimike, për konstatimit të gjendjes se sigurisë se produktit”.

Në prill të këtij viti, emisioni “Stop” në Shqipëri, pati dokumentuar përmes videove se si një nga pronarët e Kompanisë “Apetit” në Kosovë, pranonte se mund të falsifikojë dokumente dhe mishin e Brazilit ta shes si mish të Kosovës.

Reagon AUVK-u: Kompanisë “Apetit sh.p.k” i ndalohet eksporti – e shiti mishin e Brazilit për të Kosovës

Përmes kamerës së fshehur dëshmohej se si mishi i Brazilit paketohej si mish i Kosovës dhe shitej si eksport nga kjo fabrikë.

Në video, një nga pronarët e kompanisë, i pranon gazetarit se ai mund ta ndryshojë vendin e origjinës së mishit dhe t’ia falsifikojë, duke ia shitur si mish Kosove.

Ministri i Bujqësisë, Faton Peci, pati dalë në mbrojtje të kësaj kompanie në atë kohë.

Në një emision në Kanal 10, ai madje thoshte se “mishi i Brazilit është shumë kualitativ” dhe se Brazili është një nga eksportuesit më të mëdhenj në botë.

Kompania “Apetit sh.p.k” e shiti mishin e Brazilit për të Kosovës, Peci: Brazili ka mish me kualitet shumë të lartë

Në një hulumtim më pas nga Albanian Post, u kuptua se kompania “Apetit” dhe kompani me emra të tjerë, por me pronarë të njëjtë, është fituese e shumicës së tenderave në Kosovë për të furnizuar institucionet e shtetit me produkte të mishit.

Që nga viti 2022 kompania “Apetit Group” dhe kompania tjetër me të njëjtit pronarë “Riki” janë të kontraktuar nga shteti i Kosovës, që të furnizojnë të gjitha spitalet dhe institucionet e tjera të shëndetit në Kosovë me mish pule dhe mish gjethi.

Gjithashtu, të njëjtat janë të kontraktuara për të furnizuar të gjitha spitalet e Kosovës dhe institucionet e tjera shëndetësore me produkte të tjera të mishit.

“Apetit” dhe kompania “Riki” furnizojnë me mish pule, mish gjethi dhe produkte të tjera të mishit Qendrën Klinike Universitare të Kosovës (QKUK) dhe Spitalet Regjionale në Mitrovicë, Pejë, Ferizaj, Vushtrrie e Gjakovë.

Kompania “Apetit Group” dhe “Riki” – me të njëjtit pronarë – të kontraktuara nga shteti për të furnizuar QKUK-në dhe të gjitha spitalet e Kosovës me mish

Po ashtu, këto kompani kanë kontrata për të furnizuar me mish Shërbimin e Shëndetit Mendor në Prizren, Gjakovë, Pejë, Mitrovicë, Prishtinë e Shtime.

Nga hulumtimi i AP-së u kuptua gjithashtu se të njëjtat kompani, përveç spitaleve dhe institucioneve të tjera, që nga viti 2022 është e kontraktuar nga shteti i Kosovës, që të furnizojë me mish edhe Qendrën e Studentëve në Prishtinë.

Kompanitë “Apetit Group” dhe “Riki” u kontraktuan nga shteti për të furnizuar edhe Qendrën e Studentëve

Përveç kësaj, kompania me emrin “Riki Invest”, kompani me pronar të njëjtë si ajo “Apetit” është operatori ekonomik që furnizon edhe burgjet e Kosovës me mish.

Lajmin e AP-së atëherë e pati konfirmuar edhe zyrtari i Lartë për Komunikim me Publikun, Florent Gashi.

“Shërbimi Korrektues i Kosovës është pjesë e kontratës se lidhur nga ana e Agjencionit Qendror të Prokurimit (AQP). Bazuar në këtë kontratë furnizimi bëhet nga Operatori Ekonomik ‘Riki’”, thuhej në përgjigjen e Gashit.

Të njëjtat kompani “Apetit Group” dhe “Riki” janë të kontraktuara nga shteti edhe për furnizimin me produkte të mishit të 21 komunave në Kosovë.

Kompanitë “Apetit Group” dhe “Riki” u kontraktuan nga shteti për të furnizuar edhe 21 komuna të Kosovës

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.