S’ka më ndasi, Qeveria nis konsultimet publike për çështjet madhore

“Në prag të një Viti të Ri, mundësish të reja, Qeveria ka vendosur t’i japë jetë një nisme të re demokratike, duke hapur procesin gjithëpërfshirës të Këshillimit Kombëtar për Shqipërinë”, ka bërë me dije kryeministri i Shqipërisë, Edi Rama, fill pas mbledhjes së Këshillit të Ministrave.

Numri një i qeverisë shqiptare, mesditën e 24 dhjetorit, ka deklaruar se do të ndërmerret një pyetësor për të pyetur të gjithë qytetarët brenda dhe jashtë vendit, duke u marrë mendimin rreth problemeve të ndryshme.

“Në këtë mënyrë”, tha ai, “do t’i japim jetë një kuvendimi popullor për vendin, ekonominë, shoqërinë tonë”.

Ndër të tjera, Rama tha se ka ardhur koha “për t’i lënë pas llogoret e sherrit politik, pasi duhet të mendojmë për gjërat që na bashkojnë, përtej shumë atyre që na ndajnë, në mënyrë që të hedhim hapa të rëndësishëm përpara”.

Ai ka ravijëzuar se është me rëndësi “të këshillohemi së bashku për vendime që kanë rëndësi dhe impakt të drejtpërdrejtë në marrëdhëniet e Shqipërisë tonë me jashtë, me ekonominë e shtëpisë tonë me gjendjen sociale brenda shtëpisë”.

Një ndër temat që do të diskutohet, tha Rama, ka të bëjë me sistemin e drejtësisë, “për të adresuar plagët e padrejtësisë në funksion të luftës me drejtësinë”.

Pjesë e pyetësorit do të jetë edhe anëtarësimi i Shqipërisë, “nëse duhet të ndahet procesi i integrimit  të vendit drejt BE-së nga Maqedonia e Veriut”.

Po ashtu, temë diskutimi do të jetë dhe nisma rajonale e kurorëzuar “Open Balkan”, “nëse është e drejtë apo jo?”.

“Kemi hedhur një hap të parë për të adresuar problematikën e nënave me tre fëmijë apo më shumë, për t’i dhënë një mbrojtje të veçantë, edhe pse janë të punësuara”, ishte një tjetër temë diskutimi që bëri me dije Rama se do të jetë pjesë e pyetësorit.

Përpos këtyre, një tjetër temë që ceku Rama ishte “dhuna në familje dhe kundër fëmijëve”.

“Kjo duke pasur parasysh se një pjesë e opinionit kërkon ashpërsim ekstrem në dënimin e autorëve përsëritës të krimeve kundër personit”.

Sipas tij, “kjo përbën një sfidë në raport me standardet e caktuara dhe procesin tonë, që është i lidhur me botën ku jetojmë, e duam nga qytetarët opinionin e tyre”.

Një problem tjetër i madh, sipas Ramës, është ai i të punësuarve që janë viktima të metodave fiktive të pagave nga punëdhënësi.

“A duhet të angazhohemi për t’u dhënë mbrojtje të veçantë – dëmshpërblim – atyre që janë subjekt i largimit nga puna për hakmarrje. Ne të angazhohemi edhe financiarisht për t’i mbrojtur”, vijoi Rama.

Gjithashtu edhe çështja e kontributeve për pensionistët, tha kryeministri, “është domosdoshmëri jetike për të rritur bazën e mbështetjes për ata, ndërkohë që ka njerëz që thonë se pensionistëve që vazhdojnë punën nuk u duhen kërkuar kontributet”.

“Tema e amnistisë së plotë për të gjithë emigrantët që duan të formalizojnë kursimet e tyre”, tha kreu i qeverisë duke iu adresuar kësaj problematike.

Në vijim, Rama u ndal dhe te kultivimi dhe monitorimi i kanabisit për qëllime mjekësore.

“Një instrument, që shumë vende po e përdorin për të fuqizuar ekonomitë e tyre, ndërkohë që sot në Shqipëri ka njerëz që thonë se nuk është ende koha që vendi ynë të hyjë në këtë proces”, ravijëzoi Rama.

Problematika tjetër ka të bëjë me procesin e vaksinimit nëse duhet të bëhet me detyrim apo jo, si dhe për gjyqtarët dhe prokurorët që marrin vendime edhe pse nuk e kanë kaluar vetting-un.

Këta të fundit, sipas kryeministrit, duhet të thirren nga Prokuroria e Posaçme dhe duhet të pezullohen automatikisht, “kur janë vendime që skandalizojnë gjithë shoqërinë”.

Rama theksoi se, “kuvendimi nuk është detyrues as imponues për askënd dhe mbi asgjë, është një këshillim që duam të themelojnë dhe duam ta kthejmë në një instrument të marrëdhënieve me qytetarët”.

Në përmbyllje, Rama ritheksoi se ky pyetësor, që tashmë është “jetësuar”, do të jetë i përvitshëm në formë referendumi manualisht dhe online.

“Duhet të siguroheni që kemi një mbështetje shumice të atyre që na votuan. Dëmet vijnë nga ndasia dhe nga sherri politik. Kjo ka të bëjë me të ardhmen e shtëpisë sonë të përbashkët, që është Shqipëria”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.