Lajme

S’ka marrëveshje për targat në Bruksel


Kosova dhe Serbia s’kanë arritur marrëveshje për çështjen e targave.

Kështu ka bërë të ditur emisari special i Bashkimit Evropian për dialogun, Miroslav Lajçak, pas takimeve me delegacionet e të dyja shteteve të premten 13 majit në Bruksel.

Mirëpo, sipas tij ka rezultate të përziera duke shtuar se ka pasur progres në temat tjera, përfshirë energjinë.

Përmes një cicërime në ‘Twitter’ Lajçaku, ka konfirmuar përfundimin e takimeve të ndara me kryenegociatorët.

“Rezultate të përziera. Fatkeqësisht, nuk u arrit asnjë marrëveshje për targat, por u bë përparim për çështje tjera, përfshirë energjinë”, ka thënë ai.

Ndër të tjera shtoi se, “puna do të vazhdojë”.

Edhe, më 21 prill, kryenegociatori i Kosovës, Besnik Bislimi, kishte bërë të ditur se me palën serbe nuk kanë arritur marrëveshje për çështjen e targave.

“Jo, fatkeqësisht nuk mund të jap lajm të mirë. Grupi ynë punues sërish është munduar edhe ditën e djeshme që të vijë deri te një draft-propozim që do të na bartej ne sot për diskutim. Fatkeqësisht ka zero gatishmëri nga pala serbe për t’u dakorduar për një zgjidhje të mundshme brenda kornizave që i ka paraparë pika e tretë e marrëveshjes e 30 shtatorit”, kishte deklaruar ai para mediave pas takimit.

Kryeministri i Kosovës, Albin Kurti, paraprakisht pati thënë se baza e çfarëdo marrëveshjeje për targat duhet të ketë një parim elementar – reciprocitetin.

Marrëveshja e përkohshme për targat, sipas së cilës me letra ngjitëse të bardha mbulohen simbolet shtetërore të Kosovës dhe Serbisë, duhet të zëvendësohet me një marrëveshje përfundimtare dhe afati i fundit ishte sot, deri më 21 prill.

Marrëveshja në fjalë ishte arritur me qëllim të shtensionimit të situatës në veri të Kosovës, pasi Qeveria e Kosovës kishte vendosur masa reciproke ndaj Serbisë lidhur me targat dhe kjo rrjedhimisht ishte arsyeja që serbët lokalë në veri të Kosovës bllokuan për dy javë rrugët për në vendkalimet kufitare në Jarinjë dhe Bërnjak.

Lajmi në përditësim..

/Albanianpost.com

Lajmet kryesore