S’ka kuorum për votimin e projektligjit të pagës minimale

Me vetëm 58 deputetë të shumicës parlamentare që morën pjesë në votime, Kryetari i Kuvendit Glauk Konjufca, e ndërpreu seancën për një ditë tjetër në mungesë të kuorumit.

“Rregullorja më obligon që të vazhdoj tutje, dhe ta hedh në votim këtë pikë pasi që ndryshe është shkelje e rregullores”, ka thënë Konjufca.

Opozita abstenoi në votimin e Projektligjit për ndarjet buxhetore për vitin 2022.

Deputetët e PDK-së e të AAK-së e lëshuan sallën e Kuvendit. Derisa ishte duke u votuar, deputetë të PDK-së thirrnin “Marre, marre, marre”.

Shefi i Grupit të deputetëve të LDK-së, Arben Gashi deklaroi se Kuvendi nuk duhet të vazhdoj punimet tutje nëse duhet të kaloj ky mocion apo të rrëzohet.

“Sot kërkojmë me marr vendim Kuvendi, është e pamundshme që të vazhdohet seanca pa marrë vendim për këtë mocion procedural”, tha Gashi.

Shefi i grupit parlamentar të Partisë Demokratike të Kosovës, Abelard Tahiri, në seancën e Kuvendit të Kosovës, ka kërkuar që të shtyhet pika e rendit të ditës votimi në parim i projektligjit për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.

Tutje, shefi i PDK-së është shprehur se veteranët e luftës janë kategori e ndjeshme dhe duhet të trajtohen ashtu si e meritojnë.

“Është në interes tonin të përgjithshëm që kjo kategori tepër e ndjeshme të trajtohet qysh e meritojnë dhe mos të jetë një përplasje e jona politike në Kuvend mirëpo të shtyhet e të mos votohet fare sepse edhe kur kemi pasur debat e kemi refuzu një çështje të tillë”, ka deklaruar Tahiri.

Ndërsa, tha se pasi të arrijnë një dakordim me ministrinë e financave do të mund të hyjnë në votim.

“Pasi të arrijmë një dakordim me ministrinë e financave atëherë mund të hyjmë në votim. E jona është të kërkojmë të shtyhet dhe të mos votohet fare dhe të vazhdojmë me pika tjera”, tha Tahiri.

Protestuesit e Organizatës së Veteranëve të Luftës së Ushtrisë Çlirimtare të Kosovës kanë tentuar të hyjnë brenda Kuvendit të Kosovës gjatë protestës që po mbajnë aktualisht në oborr të Kuvendit të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.