Nëse dikur për Bashkimin Evropian përbënte sukses në vete dhe ecje përpara realizimi i takimeve mes krerëve të Kosovës e atyre të Serbisë, tani takimi në vetvete nuk nënkupton ecje përpara.
Ky ishte shqetësimi i emisarit special të Bashkimit Evropian për dialogun Kosovë – Serbi, Miroslav Lajçak, i shpërfaqur, deri diku me frustrim, në vizitën e fundit të tij në Kosovë.
Lajçak, para largimit nga Prishtina të enjten mbrëma, deklaroi se brenda kësaj jave pati takime me Albin Kurtin (dy herë) e me presidentin serb, Aleksandër Vuçiç, por dy liderët “për momentin” lëvizin në drejtime të kundërta.
“Këtë javë jam takuar me Kurtin dy herë dhe kam biseduar edhe me Vuçiç-in, por nuk kishte rezultate pozitive nga këto takime”, deklaroi burokrati evropian.
“Për momentin, ambiciet tona janë të ndryshme dhe tashmë nuk është çështja thjesht të organizimi i takimeve, por gjithashtu edhe për vetë marrëveshjen, prandaj po punojmë në këtë drejtim”.
Megjithatë, përkundër dallimeve, sllovaku tregoi se përpjekjet për akordim date për takimin e radhës po i vazhdon, por nuk specifikoi datë se kur ky takim potencialisht mund të mbahet.
I pyetur se cilat janë gjasat që Kurti e Vuçiç të shihen sy me sy brenda këtij viti, Lajçak pohoi se nuk do që të spekulojë.
“Dialogu do të vazhdojë, sepse është e rëndësishme dhe ne kemi vullnet të mirë. Por, duhet të sigurohemi se takimi do të sjellë rezultate të mira”.
/Albanianpost.com
