“Situata në veri të Kosovës”, zyrtari italian thotë se nevojitet zgjidhje diplomatike

Ministri italian i Mbrojtjes, Guido Crosetto nënvizoi të martën e 30 majit se Italia “është në kërkim të një zgjidhjeje diplomatike, sesa të mendojë për forcën ndaluese që mund të bëjë ushtarakët e pranishëm në zonë”.

Lajmi u bë i ditur nga agjencitë italiane, duke cituar deklaratën e zyrtarit për mediat.

Sipas tij, në Kosovë “gjendja është përmirësuar në krahasim me dje, duket se ka më pak tension edhe nëse ka ende demonstrata para bashkive të katër komunave në veri të vendit”.

Për këtë arsye, shtoi ai, “mbrëmë me ministrin Tajani dhe kryeministren Meloni e kaluam duke thirrur kolegët tanë serbë dhe kosovarë, si dhe kolegët tanë evropianë, duke kërkuar që edhe ata të bëjnë presion, sepse është diçka që vjen nga një vullnet politik për të rritur tensionin dhe ne do të donim që kjo gjë të ndalonte”.

Crosetto tha se “kufiri ndërmjet Kosovës dhe Serbisë është një nga ato vende të rrezikshme ku një shkëndijë mund të ndezë zjarr”.

Për 14 ushtarët italianë e plagosur, ministri siguroi se për fat ata janë mirë.

“Dy personat që kanë marrë plagët më të rënda ndodhen në dy spitale të shkëlqyera dhe operacioni është duke u zhvilluar. Tre janë kthyer tashmë në punë, nëntë të tjerët janë në infermierinë italiane. Ne i qetësuam familjet. Me përjashtim të disa frakturave komplekse që po punohet, të tjerat janë në gjendje të mirë shëndetësore”, theksoi zyrtari i mbrojtjes.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.