Komandanti i KFOR-it, Ozkan Ulutas të martën është takuar me kryetarin e Komunës së Gjilanit, Alban Hyseni, me të cilin ka diskutuar rreth situatës së sigurisë në Kosovë e po ashtu për dialogun mes Kosovës dhe Serbisë.

Takimi është bërë i ditur përmes një komunikate të lëshuar nga KFOR-i.

“Ata shkëmbyen mendime mbi trendët më të fundit të sigurisë dhe mbi aktivitetet e KFOR-it nën mandatin e tij të OKB-së dhe mbështetjen për dialogun e lehtësuar nga BE-ja ndërmjet Beogradit dhe Prishtinës, për të mirën e të gjitha komuniteteve”, thuhet në komunikatë.

Ulutas, gjatë takimit theksoi përkushtimin e “palëkundur” të KFOR-it në mbështetje të stabilitetit rajonal.

Më 24 maj, komandanti i KFOR-it, gjeneralmajor Ozkan Ulutas, ka kërkuar nga kryeministri i Kosovës, Albin Kurti dhe ministri i Punëve të Brendshme, Xhelal Sveçla, që të shmangen veprimet e njëanshme të cilat e përkeqësojnë situatën – pas veprimeve të fundit ku policia kishte mbyllur gjashtë njësi të “Bankës Postare Kursimore” të Serbisë.

“Veprimet e njëanshme që mund të përkeqësojnë tensionet duhet të shmangen dhe se duhet të ruhet koordinimi i duhur mes të gjithë aktorëve përkatës”, thuhej në komunikatë.

Në maj, Ulutas kishte takuar edhe Osmanin e Maqedoncin për të diskutuar rreth situatës së sigurisë.