Sistemi “Javelin” i nevojshëm për mbrojtjen e Kosovës – mesazh për çdo armik potencial, thotë admirali amerikan
![](https://albanianpost.com/wp-content/uploads/2024/01/admirali-.jpg)
Mark Montgomery, drejtor pranë Fondacionit për Mbrojtjen e Demokracive (FDD) në Shtetet e Bashkuara të Amerikë s (SHBA), admiral në pension i forcave detare amerikane, në një intervistë për “Zëri i Amerikës” të enjten, deklaroi se aprovimi i kërkesës së Kosovës për blerjen e sistemit anti-tank “Javelin” është vendim i duhur i SHBA-së.
Montgomery, i cili shërbeu si drejtor i politikave në Komisionin e Senatit të SHBA-së për Forcat e Armatosura (SASC), theksoi se sistemi i sofistikuar anti-tank “Javelin” është i nevojshëm për të mbrojtur integritetin territorial të Kosovës, ndërsa mesazhi që përcillet me shitjen e sistemit amerikan për Kosovën është edhe diplomatik – mesazh për çdo armik potencial.
“Ne e dimë se duam t’i sigurojmë Kosovës pajisje të nevojshme për të krijuar stabilitet brenda kufijve të saj nga çfarëdo përdorim force nga jashtë. Sistemi ‘Javelin’ është një armë e përsosur, sepse është një armë fantastike mbrojtjeje për të frenuar një sulm të mundshëm me automjete të blinduara ndaj Kosovës”, potencoi Montgomery, një ushtarak me përvojë të gjatë.
“Vlerësimi i SHBA-së është se Kosova duhet të pajiset me sistem armësh të avancuara. Kjo është armë që përdoret nga një ushtar i vetëm – ne nuk po u japim pajisje të shkallës së lartë të manovrimit ushtarak, por po u ofrojmë atë që u duhet. Dhe po i dërgojmë mesazh çdo armiku potencial: Kosova ka pajisjet që i duhen për të frenuar një sulm të mundshëm”.
Vlera e “Javelin”-it amerikan që Kosova dëshiron ta blejë, në bazë të Agjencisë së Bashkëpunimit për Sigurinë dhe Mbrojtjen (DSCA), vlerësohet 75 milionë dollarë, ndërsa në pako përfshihen gjithsej 246 raketa dhe 24 njësi për lëshimin e tyre – një masë që synon rritjen e aftësive mbrojtëse të Kosovës, në përputhje me objektivat e sigurisë kombëtare të SHBA-së.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com