Sindikata e Policisë: Arrestimet nga IPK-ja sikur të ndonjë krimineli ta pakapshëm

Kryetari i Sindikatës së Policisë së Kosovës, Imer Zeqiri, ka shprehur shqetësime me arrestimet e fundit të zyrtarëve policor në pikat kufitare nën dyshimet për keqpërdorim të detyrës e korrupsionit.

Ai ka thënë se arrestimi është veprimi i fundit që duhet të ndërmarrin institucionet përgjegjëse, pasi të kenë siguruar prova të mjaftueshme për të cilat dyshohen se i ka Inspektorati Policor i Kosovës.

“Shqetësimi i Sindikatës së Policisë së Kosovës rreth këtyre arrestimeve është se ka apo nuk ka prova të mjaftueshme për dyshim të bazuar, Inspektorati Policor i Kosovës me rastin e arrestimit të gjithë këtyre zyrtarëve policorë, është masa e fundit dhe masa më e rëndë jo vetëm për një zyrtar policor, por edhe për një qytetar të thjeshtë”.

“Arrestimi është pjesa ku duhet të ketë prova të mjaftueshme dhe bazike me dyshim të bazuar se vërtetë ai e ka kryer një vepër penale për të cilën pretendohet ose në këtë rast pretendojnë IPK-ja”, ka thënë Zeqiri për agjencinë e lajmeve Ekonomia Online.

Ai bëri të ditur se në dy rastet e fundit shumica e të arrestuarve janë liruar në procedura të rregullta.

“Kemi dy rastet e fundit që është bërë arrestimi në kufi i zyrtarëve  policorë, në rastin e parë 48 zyrtarë, 20 prej tyre janë liruar në procedura  të rregullta dhe janë kthyer në shtëpi. Në rastin e dytë janë arrestuar 26 zyrtarë policorë dhe 14 prej tyre janë liruar dhe janë në shtëpi”.

“Mënyra e arrestimit që është parë para mediave ka qenë sikur se të arrestoheshin ndonjë kriminel i pakapshëm. Ata nuk kanë qenë të rrezikshëm dhe nuk ka qenë mundësia e tyre për ikje për të bërë një arrestim të tillë në mënyrë spektakulare”.

Zeqiri, ka paraqitur një kërkesë edhe ndaj Inspektoratit të Kosovës.

“Ne si Sindikatë kërkojmë nga Inspektorati i Kosovës që mos të bëjë spektakël dhe arrestim të zyrtarëve policorë para kamerave. Unë e kam bindjen time se po bëhet spektakël me vetë faktin që zyrtarët policorë arrestohen para kamerave dhe ai bëhet lajm. E që është lajm i keq për shkak se me këto spektakle po krijojnë një imazh të keq të institucionit të Policisë para qytetarëve të vendit”.

Mirëpo, shprehet i bindur se policia nuk është ndikuar nga politika.

“Unë shpresoj dhe besojë shumë se institucioni i policisë është prapë institucioni më i besueshëm në vend dhe në mënyrë grupore nuk është i ndikuar politikisht Policia. Ajo mund të jetë individuale, edhe tek veprat penale edhe tek ndikimi”.

Më 15 mars, të prangosur janë dërguar në Gjykatën Themelore të Prishtinës 50 zyrtarë, 48 prej tyre policë.

Ata u arrestuan nga Inspektorati Policor i Kosovës dhe Prokuroria Speciale si të dyshuar për marrje të ryshfetit.

Arrestimi i kaq shumë policëve u proklamua si i madhi ndonjëherë nga pushteti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.