Flokët e vajzave te pikturat e artistes iraniane Arghavan Khosravi janë të ngarkuara me emocione.
Ajo është rritur në një familje laike në Teheran pas Revolucionit Iranian të vitit 1979, pasi regjimi i ri teokratik vendosi rregulla shtypëse për gratë.
Ndër tyre edhe vendosjen e detyrueshme në publik të hixhabit.
“Në një moshë shumë të hershme kuptova se ekziston një kontrast midis hapësirave private dhe atyre publike. Në shtëpi jeni i lirë të bëni çfarë të doni”, ka treguar Khosravi.
Kështu, artistja mësoi të jetonte një jetë të dyfishtë.
Khosravi e pati përballjen e saj me policinë e moralit në vitin 2011 dhe u ndalua përkohësisht.
E vendosur në SHBA që kur u transferua në vitin 2015 për të studiuar pikturë, ish-dizenjatorja grafike përdor flokët e gjatë e të derdhur si simbol në veprat e saj të ngarkuara me metafora.
Portretet e saj surreale, ëndërrimtare të grave, të cilat shfaqen në sipërfaqe me shumë panele që i ngjajnë fasadave arkitekturore, u ndikuan nga perspektivat e rrafshuara dhe detajet e përpikta të pikturave në miniaturë persiane.
Në pikturat e saj, vajzat dhe gratë shpesh shfaqen të lidhura me litarë ose të fshehura pas mureve, luleve ose duarve. Njëfarë lufte për autonomi.
Por kanë edhe një prani komanduese.
Ajo vë në kontrast litarët dhe prangat me shprehjet e lirisë si pëllumbat. Me ngjyra të harlisura dhe zona shkëlqimi në të cilat pjesët e trupit të subjekteve duket se shkëlqejnë.
Veprat e saj artistike nuk janë të zymta, por të shndritshme.
“Kontrasti dhe kontradikta është një nga konceptet kryesore që po eksploroj në punën time”, ka treguar ajo, duke theksuar dikotomitë e jetës së shumë grave iraniane.
Fijet e kuqe ose të zeza janë një motiv i përsëritur në pikturat e saj, herë si vija të pikturuara, herë si vargje fizike që varen në kanavacë.
“Po mendoja për kujtimet e mia nga Irani. Ka shumë vija të kuqe që na vendos qeveria”, ka thënë artistja.
Që nga shpërthimi i protestave në shtator, Khosravi ka parë që flokët të bëhen një simbol i fuqishëm teksa gratë i presin, në shenjë proteste ose solidariteti.
Po ashtu djegin hixhabet e tyre në rrugë.
Por Khosravi shpreson që subjektet e saj të përfaqësojnë jo vetëm përvojën e grave iraniane, por të çdo gruaje, të drejtat e së cilës kërcënohen.
“Diçka e përbashkët mes të gjithave është se ato janë në të njëjtën moshë me mua, ose ngjyra e flokëve apo tiparet e tyre janë, deri diku, të ngjashme me të miat sepse po mendoj edhe për gratë e tjera që kanë kaluar të njëjtën gjë”, ka treguar ajo.
Njëherazi ajo nuk dëshiron që këto figura të jenë shumë specifike kulturalisht. Çdokush në çdo cep të botës mund të lidhet me veprat e saj bazuar në përvojat e veta.
Aktualisht artistja është duke skicuar ide për piktura të reja, duke iu përgjigjur asaj që shpreson se po ndryshon vendin e saj të lindjes.
“Në një moment e kisha humbur shpresën se ndoshta gjërat do të ndryshonin, por tani është kjo energji e re, është shumë magjepsëse dhe shpresoj që të çojë në ndryshime thelbësore”, ka thënë ajo.
Khosravi po punon për një grup të ri simbolesh që do të evokojnë forcën e grave që marrin përsipër një qeveri të tërë për të kërkuar autonomi mbi trupin e tyre.
“Në dritën e gjithë asaj që po ndodh, dua t’u jap më shumë fuqi”, ka ravijëzuar ajo.
Marrë nga “CNN”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
