Sifan Hassan: Nga refugjate në ndjekjen e një arritjeje legjendare

Atletja holandeze, Sifan Hassan, kampionia olimpike në fuqi në 5 mijë metra dhe 10 mijë metra, synon të mbrojë të dy titujt në Paris dhe t’i shtojë një fitore maratonë arritjeve të saj. Vetëm vrapuesi çek, Emil Zatopek ka arritur ta realizojë këtë sukses, dhe kjo ishte në Helsinki në vitin 1952.

Pasi u kualifikua të premten e kaluar në garat 5 mijë metra, Hassan do të garojë në finale sot, më 5 gusht. Pas kësaj, ajo do të vrapojë në 10 mijë metra të premten e ardhshme dhe maratonën të dielën.

Kjo sekuencë ngjarjesh përfaqëson një nivel të tendosjes fizike që asnjë grua tjetër nuk e ka provuar më parë.

“Jam mjaft kurioze të shoh se si do të dalë”, ka pranuar së fundmi Hassan gjatë një video-konference për shtyp. “Vrapimi i maratonës me vetëm një ditë pushim… Të shohim”.

Hassan, një atlete holandeze me origjinë etiopiane dhe medaliste olimpike në vrapimin në distanca të gjata dhe të mesme, vazhdon të jetë një burim frymëzimi për të rinjtë që stërviten sot në ambientet ku ajo u zhvillua si vrapuese më shumë se një dekadë më parë.

Historia e saj mishëron sfidën e kapërcimit të pengesave. Ajo mbërriti në qytetin e Eindhoven si një refugjate e re që kërkonte azil. Pas këtij udhëtimi të rëndësishëm, përpjekja dhe disiplina e saj e ndihmuan të shkëlqejë vite më vonë në “Eindhoven Atletiek”, të hartojë një karrierë të suksesshme në pista dhe të triumfojë në Lojërat Olimpike të Tokios me dy medalje të arta dhe një bronz në 5 mijë metra, 10 mijë metra dhe 1 mijë e 500 metër, përkatësisht.

Hassan ka lindur në Adama, në juglindje të Addis Ababa, kryeqyteti i Etiopisë. Edhe pse u rrit në një fermë nga nëna dhe gjyshja e saj gjatë fëmijërisë, në moshën 15-vjeçare, për arsye ende të panjohura, ajo vendosi të shkonte në Holandë në kërkim të mundësive të reja dhe më të mira.

Gjëja e parë që ajo bëri pas mbërritjes ishte akomodimi në një qendër rinore në komunën e Zuidlaren, në veri të vendit. Ajo e ka pranuar se gjatë kësaj kohe nuk ka bërë gjë tjetër veçse ka qarë çdo ditë.

“Ishte si një lule që nuk merrte rrezet e diellit”, rrëfeu ajo.

Me kalimin e kohës, ajo mbërriti në qytetin e Eindhovenit me synimin për të ndjekur një kurs infermierie, ku takoi etiopianë të tjerë që tashmë ishin anëtarë të klubit lokal të atletikës dhe që frymëzuan dashurinë e saj për sportin.

Ad Peeters, një nga drejtuesit e “Eindhoven Atletiek” e kujton Hassan-in gjatë asaj faze fillestare si një vajzë e turpshme që mbeti nën hijen e vrapuesve të tjerë të së njëjtës kombësi që tashmë ishin përshtatur me kërkesat e sportit.

“Ajo ende nuk kishte disiplinën e nevojshme për t’u stërvitur, gjë që ishte e kuptueshme, duke pasur parasysh se ishte një vajzë 17-vjeçare e vetme dhe e ardhmja e së cilës ishte mjaft e pasigurt”, u shpreh Ad.

Klubi punoi për të përmirësuar dhe përsosur teknikën e saj si atlete. Trajneri i saj vëren se në atë kohë, edhe pse ishte një vrapuese natyrale, ajo duhej të punonte në koordinimin e këmbëve dhe krahëve.

Mbështetja shtrihej përtej sportit: “Ne u siguruam që ajo të mos bënte gjëra të gabuara, qoftë në stërvitje apo në jetën e saj personale. E mbajtëm të sigurt, e morëm me makinë për të shkuar në stërvitje dhe e çuam në gara”, komentoi Peeters.

Me këtë mbështetje, jeta e Hasan u përmirësua me shpejtësi. Fillimisht, ajo mori pasaportën që e njihte si shtetase holandeze dhe më pas trajnerët e njohën talentin dhe potencialin e saj, duke e dërguar në qendrën elitare të stërvitjes olimpike në Papendal.

Ajo që pasoi është e njohur, një histori e pasur medaljesh. Që nga viti 2015, ajo ka grumbulluar rreth një duzinë medaljesh nga kampionate të ndryshme botërore dhe evropiane, si dhe suksesin e saj në Lojërat e Tokios.

Vrapuesja mbetet anëtare e “Eindhoven Atletiek”, megjithëse aktualisht banon në Shtetet e Bashkuara, ku ka qenë duke u stërvitur pa u lodhur gjatë gjithë sezonit për të konkurruar në gjendje maksimale fizike në “Paris 2024”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.