Lajme

Si u transformua UÇK-ja në TMK, flet ish-komandanti Agim Çeku për Albanian Post


Agim Çeku, ish komandanti i TMK-së

“Ka pasur shumë kundërshtime dhe ka qenë një sfidë në vete transformimi i Ushtrisë Çlirimtare të Kosovës në Trupat Mbrojtëse të Kosovës”.

Kështu është deklaruar udhëheqësi i parë i TMK-së, Agim Çeku, i cili për Albanian Post ka treguar procesin e transformimit të UÇK-së.

Sipas tij, KFOR-i dhe UNMIK-u dëshironin që UÇK-ja të demilitarizohet dhe të mos mbetet asgjë nga kjo ushtri, ndërsa sipas Çekut, Kosova ka pasur një qasje tjetër duke kërkuar që UÇK-ja të mbijetojë si një strukturë e re me një mision të ri.

“Sfidat kanë qenë me të vërtet shumë të mëdha, por pas pajtimit në disa pika si dhe me ndërhyrjen e  ish -komandantit suprem të forcave të NATO-s, Wesley Clark, dhe të Ish-sekretarit të përgjithshëm të NATO-s, Javier Solana, është arritur kompromisi dhe UÇK-ja ka mbijetuar si strukturë”, ka thënë Çeku, për Albanian Post.

“Me argumentet dhe diplomacinë tonë modeste në atë kohë arritëm të realizojmë kërkesat tona, dhe ta rruajmë dhe ta fuqizojmë partneritetin tonë me NATO-n dhe KFOR-in në terren”, ka shtuar ai.

Trupat Mbrojtëse të Kosovës

Sipas ushtarakut Çeku, TMK-ja nuk ishte forcë por strukturë, e cila ka arritur të mbajë të gjallë frymën strukturën, idenë e UÇK-së dhe përmes krijimit të infrastrukturës dhe kuadrove profesionale ka kontribuar në krijimin e ushtrisë së Kosovës.

“Ka pasur përpjekje që TMK-ja si ish – UÇK të largohet nga dukja ushtarake e të transformohet në organizatë civile e në një agjenci për emergjenca kurse përpjekja jonë ka qenë që TMK-ja të transformohet në ushtri”.

Ish-komandanti i UÇK-së, ka folur edhe për Forcën e Sigurisë së Kosovë, e cila sipas tij ka standarde të NATO-s dhe është e gatshme të kontribuoj në këtë institucion ndërkombëtar.

22 vjet nga themelimi i TMK-së

19 shtatori i këtij viti shënon 22 vjetorin e themelimit të Trupave Mbrojtëse të Kosovës (TMK).

Bazuar në marrëveshjen e Kumanovës dhe në pajtim me marrëveshjen e Rambujesë, ishte paraparë çarmatimi i Ushtrisë Çlirimtare të Kosovës dhe transformimi i saj në TMK.

Dhe rrjedhimisht me hyrjen e trupave ushtarake të NATO-s, në Kosovë në vitin 1999 filloi edhe transformimi i UÇK-së.

TMK-ja u themelua në kohën e fillimit të organizmit institucional të vendit, që po ndodhnin jo vetëm në Kosovë, por edhe në rajon, e cila rritej e forcohej por në kushte jo të mira dhe paga të ulëta.

Sipas marrëveshjes, detyrat dhe të drejtat e TMK-së në atë kohë ishin veprimi për ndalimin dhe zvogëlimin dëmeve nga katastrofat natyrore dhe aksidentet, ofrimi i ndihmës në zona të rrezikuara, ndihma në pastrimin e fushave të minuara, ndihma për ri-ndërtimin dhe komunitetet.

Ndërsa procesi i shpërbërjes së TMK-së, dhe krijimit të Forcës së Sigurisë së Kosovës, filloi me me 2 shkurt të vitit 2007 kur i dërguari special për statusin e Kosovës, Martti Ahtisaari, dorëzoi propozimin “Standardet për Kosovën” në Prishtinë, në të cilën parashihej edhe shpërbërja e TKM-së, dhe krijimi i një force të re.

“Do të krijohet një forcë e re, profesionale dhe shumë-etnike për sigurinë e Kosovës, e cila do të jetë e armatosur lehtë dhe do të jetë e aftë të mbulojë nevoja të caktuara të sigurisë sipas Shtesës VII të kësaj marrëveshje. Trupat Mbrojtëse të Kosovës, pasi e arritën qëllimin e tyre, duke përfshirë këtu lehtësimin e rindërtimit pas lufte të Kosovës. Ato do të shpërndahen 1 vit pas miratimit të kësaj marrëveshjeje”, shkruhej në Planin e Ahtisaarit.

Shpërbërja e TMK-së është bërë me pajtimin e të gjithë faktorëve relevantë vendorë dhe të huaj.

Ndërsa me 21 janar të vitit 2009 u krijua FSK, e cila fillimisht kishte përgjegjësi që të përballet me katastrofat e rënda, siç janë tërmetet, vërshimet ose zjarret që mund të kërcënojnë Kosovën.

Pas 10 vitesh FSK është shndërruar në ushtri të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore