Si e konfirmoi deputeti i Vetëvendosjes se Nagip Krasniqi mban pozitën në KEK kundërligjshëm
SHFLETO
Nagip Krasniqi dhe Albin Kurti
Altina Marmullaku
20.04.2023 10:09
Loading Icons...
Në tentativë për ta mbrojtur të Nagip Krasniqin, të arrestuarin nga Prokuroria Speciale për “Keqpërdorimi të pozitës apo autoritetit zyrtar” , “Ushtrim të ndikimit” dhe “Konflikt të interesit”, deputeti i Lëvizjes Vetëvendosje, Adnan Rrustemi, ka treguar publikisht se Krasniqi është emëruar kryeshef i Korporatës Energjetike të Kosovës në formë jo të ligjshme.
Çfarë tha Rrustemi?
Pas arrestimit të Krasniqit nga policia e Kosovës, një numër deputetësh nga Vetëvendosja, akuzuan kryeprokurorin e Prokurorisë Speciale, Blerim Isufajn, se arrestimin e ka bërë me qëllime malicioze, duke provuar kështu hakmarrje, meqë presidentja, Vjosa Osmani, nuk po e emëron kryeprokuror të shtetit.
Mes tyre ishte edhe deputeti Rrustemi.
“Asnjë aktakuzë e arrestim për një muaj me 16 barrikada në veri, asnjë aktakuzë për qindra dosje të dorëzuara, e mos të flasim që deri para dy viteve ishin aty ku janë si prokurorë për të mbrojtur korrupsionin përmes aktakuzave qëllimisht të dobëta, por ju hodh sipër kryeshefit të KEK-ut nga LVV”.
“…ju hodh sipër kryeshefit të KEK-ut nga LVV”.
Meqë Ndërmarrjet Publike, siç është KEK-u, nuk janë ndërmarrje partiake, por prona të shtetit të Kosovës, ligji është përkujdesur që të krijojë siguresa që udhëheqës zgjidhen persona që nuk kanë lidhje me parti politike.
Prandaj, është e ndaluar me ligj që pozitën ta mbajë dikush që është anëtar apo i caktuar nga ndonjë parti politike.
Madje, saktësohet që i zgjedhuri jo vetëm në momentin kur emërohet, por edhe tri vjet më herët nuk duhet të ketë pasur ndonjë pozitë partiake në ndonjë nga partitë politike.