Shqipëria

Si do të funksionojë matja e energjisë nga panelet diellore


Në Shqipëri ka hyrë në fuqi ligji i përllogaritjes vjetore të energjisë që përftohet nga panelet fotovoltaike (diellore).

Përfaqësuesi i Ministrisë së Infrastrukturës dhe Energjisë, Enea Karakaçi, deklaroi se ky vendim mundëson që pjesa e tepërt e energjisë së përftuar të mos humbasë.

“Është miratuar udhëzimi që bën të mundur që tani kompensimi i energjisë elektrike të prodhuar aty të matet në mënyrë vjetore. Në këtë kuptim, në ato muaj kur ka tepricë energjie siç mund të jenë Qershor, Korrik, pra muajt e verës. Ajo energji nuk humbet, por përdoret në muajt në vazhdim për të kompensuar konsumin energjetik”, u shpreh zyrtari duke cituar transmetuesin Klan News.

Deri më tani janë rreth 1 mijë subjekte private përfshirë bizneset dhe familjarët, të cilët do përfitojnë nga kompensimi vjetor.

“Kapaciteti total sot i instaluar për vetë-konsum është 103 MW, ndërkohë subjektet të cilat kanë instaluar panele fotovoltaike janë rreth 1 mijë, ku 70 për qind janë biznese dhe 30 për qind janë abonentë familjarë”, shtoi Karakaçi.

Sipas tij, Shqipëria ka kapacitetin më të lartë të lejuar në rajon prej 500 kWh dhe madje krahasuar edhe me shumicën e vendeve të BE-së.

“Serbia e lejon deri në 150 kWh, Maqedonia e Veriut e lejon deri në 80 kWh, vetëm tre shtetet te tjera evropiane kanë të njëjtin kapacitet me Shqipërinë prej 500 kWh”, arsyeton zyrtari shqiptar.

Ligji përcakton se klientët që prodhojnë energji nga panelet diellore për qëllime auto-konsumatore do t’i nënshtrohen skemës vjetore të matjes, duke ndryshuar atë aktualen që parashikon netim mujor.

Në dispozitat kalimtare specifikohet se neni ku përfshihen të gjitha ndryshimet që prekin vetë-prodhuesit e energjisë do të nisë zbatimin nga data 1 janar 2024.

Por, sipas dokumentit, deri në këtë datë klientët privatë apo publike si dhe klientët familjarë mund të instalojnë një kapacitet total deri në 500 kW për prodhimin e energjisë.

Kjo, nga burimet e rinovueshme për të mbuluar një pjesë ose të gjithë energjinë që nevojitet për nevojat e tij dhe të injektojë energjinë e tepërt të prodhuar në rrjetin e shpërndarjes.

“Këta klientë përfitojnë sipas skemës së matjes neto të energjisë dhe duhet të instalojnë me shpenzimet e tyre një matës me dy drejtime. Bilanci neto dhe faturimi bëhen në baza vjetore për secilën pikë matëse”.

Aplikimi i kësaj skeme ka kohë që kërkohet nga bizneset dhe grupet e interesit, teksa viti që lamë pas shënoi një kërkesë në rritje për instalimin e këtyre impianteve, si pasojë e çmimeve tejet të larta e të papërballueshme të energjisë elektrike.

Ndërkaq, qeveria nuk pranoi kërkesën tjetër të bizneseve, për rritjen e kapacitetit të lejuar për t’u instaluar, duke e lënë në 500 kW apo 0.5 MW.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore