Si do të duket Qendra Olimpike në Bërnicë për Lojërat Mesdhetare 2030?

Të themeluara në vitin 1951, Lojërat Mesdhetare janë një ngjarje multi-sportive që zhvillohet çdo katër vjet me përkrahjen e Komitetit Olimpik Ndërkombëtar. Për herë të parë, Prishtina do të jetë nikoqire e tyre në atë që do të jetë ngjarja më e madhe sportive e organizuar nga ajo deri më tani.

Marrë për bazë faktin se një gamë e gjerë sportesh, 24 shosh, do të luhen në kuadër të Lojërave Mesdhetare, Kosova ka marrë obligim që për të garantuar mbarëvajtjen e lojërave në nivelin më të lartë, t’i ndërtojë të gjitha hapësirat sportive.

Më e rëndësishmja prej tyre është Qendra Olimpike, e vendosur në Bërnicë, për shkak të pozicionit të përshtatshëm gjeografik dhe afërsisë me kryeqytetin.

Sipas draftit të Masterplanit i propozuar nga Shërbimi i Arkitektit të Kryeqytetit, Kompleksi sportiv do të ndërtohet në 60 hektarë tokë dhe përveç hapësirave sportive do t’i ketë të gjitha ambientet tjera shoqëruese, përfshirë hapësirat administrative, komerciale dhe një stacion të autobusëve.

Hapësira qendrore, sipas draft-propozimit të SHAK, do të jetë e dedikuar për stadiumin e futbollit, që mëton të jetë një nga kryeveprat arkitekturore të qytetit.

“Përveç ngrehinës qendrore, e cila do të ndërtohet duke pasur në mendje zhvillimin teknologjik dhe që do të ketë 25 mijë ulëse, do të ketë edhe dy fusha tjera stërvitore, me bar natyral”, thuhet në një njoftim i publikuar nga SHAK.

Afër stadiumit, sipas draft-propozimit, synohet të jetë kompleksi i pishinave olimpike, që do të ndërtohet në përputhje me kriteret më të larta ndërkombëtare, duke synuar që të kthehet në një nga ambientet më të rëndësishme në rajon për sporte ujore.

“Përgjatë Lojëra Mesdhetare 2023, ky kompleks i përbërë nga një pishinë e brendshme dhe dy pishina të jashtme do të jetë hapësira kryesore në të cilën do të zhvillohen garat e sporteve ujore”, njofton më tej SHAK.

Më tej draft-propozimi i SHAK njofton se një prej sporteve më të rëndësishme, të cilit deri tani në vend i ka munguar infrastruktura, do të ketë kompleksin e tij brenda kësaj qendre.

Është fjala për sportin e Tenisit qendra e të cilit do të ketë 2 mijë ulëse në kuadër të së cilës do të ketë edhe gjashtë fusha të tjerë, secila me nga 200 ulëse.

“Përveç tenisit, fusha qëndrore ka parametra të atillë që mundëson luajtjen brenda saj edhe të ndeshjeve të hendbollit, volejbollit dhe futbollit të vogël”.

Qendra Olimpike do të ketë gjithashtu qendrën e sporteve me dorë dhe ajo e sporteve luftarake.

“Hapësira qendrore e sporteve me dorë, ku do të luhen të gjitha ndeshjet në basketboll, hendboll dhe volejboll do të ketë kapacitet maksimal prej 3 mijë e 500 ulësesh dhe duke qenë e ndërtuar me standardet më të larta, hapësirat e saj do të jenë të përdorshme në variante të ndryshme”.

Ndërsa arena e sporteve luftarake, e vendosur në krah të asaj të sporteve me dorë, do të ketë kapacitet po për 3 mijë e 500 shikues dhe pas përfundimit të Lojërave Mesdhetare synohet të kthehet në qendrën e munguar të nivelit më të lartë, për të gjithë sportistët e këtyre disiplinave që ka vendi.

Në anën tjetër Atletika dhe disa sporte të tjera, përfshirë çiklizmin dhe 3×3 basketbollin, do të zhvillohen në fushat e hapura, të cilat kanë kapacitet maksimal prej 5 mijë ulësesh.

“Përveç hapësirave sportive, kompleksi do të ketë edhe hapësirat administrative, për federata dhe Komitetin Olimpik të Kosovës, një parking të madh dykatësh nën tokë, stacionin e autobusëve dhe hapësira komerciale, përfshirë një qendër tregtare, hotelin, ku do të jetë e vendosur qendra e konferencave, si dhe pjesën akomoduese të Fshatit Olimpik.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.