Për dy muaj, Kuvendi i Kosovës ka mbajtur vetëm tri seanca plenare, për kundër rregullores që përcakton se brenda një muaji duhet të mbahen të paktën dy.
Sipas monitoruesve, ngecja e punës së Kuvendit ka ndodhur si pasojë e angazhimit të deputetëve në zgjedhjet lokale, e cila do të pamundësojë agjendën e paraparë për këtë vit që të përmbushet plotësisht, pasi që Kuvendi deri tani ka arritur të miratojë vetëm 11 ligje nga 65 gjithsej sa kanë qenë në procedurë.
Këtë për Albanian Post, e bën të ditur Agnesa Haxhiu hulumtuese në Instituti Demokratik i Kosovës (KDI), organizatë kjo që monitoron punën e Kuvendit.
“Sesioni vjeshtor është karakterizuar me një dinamikë goxha të ulët të punës dhe kjo normalisht është për shkak të ndikimit që kanë pasur zgjedhjet lokale në punën e Kuvendit dhe është parë një lloj koordinimi joformal, në heshtje, i të gjitha grupeve parlamentare që të mos ketë një dinamikë të shtuar të punës së Kuvendit”, deklaroi Haxhiu për AP.
Ajo thekson që së fundmi ka pasur edhe dështime të mbledhjes së Kryesisë së Kuvendit, që ka pamundësuar edhe caktimin e seancave të reja plenare.
“Përveç deputetëve e nënkryetarëve të cilët janë angazhuar drejtpërdrejtë në zgjedhje, kjo po ndodh edhe për shkak të bojkotimit të punës së Kuvendit nga deputetët e Listës Serbe. Ky stagnim pritet ta përcjellë Kuvendin edhe javëve në vijim për shkak të fushatës e balotazhit që do të mbahet së shpejti”.
E arsyeje tjetër e mos mbajtjeve të seancave plenare mund të jetë kandidimi i deputeteve apo kryesisë për kryetar të komunave.
“Disa prej deputetëve që kanë garuar për kryetar të komunave kanë pasur edhe pozita udhëheqëse brenda kuvendit pra nuk kanë qenë kështu vetëm deputet, kanë pasur nënkryetar të kuvendit, shefa të grupeve parlamentare, edhe kjo normalisht e ka penguar mbarëvajtjen e punimeve”.
Njëri nga nënkryetarët, Bedri Hamza, i cili ka fituar në raundin e parë të zgjedhjeve në Mitrovicë e ka liruar këtë pozitë.
“Kemi pasur një nënkryetar që ka garuar për kryetar komune dhe tash vetëm se e ka marrë pozitën atje e ka liruar pozitën e nënkryetarit. Aktualisht e kemi minus një anëtar në Kryesi dhe pa zgjedhjen e tij do të jetë kështu njëfarë problematike për ta të funksionojnë në mënyrë të rregullt në qoftë se vazhdon ta bojkotojë punën e Kuvendit Lista Serbe”.
Edhe drejtoresha ekzekutive e Lëvizjes FOL, Mexhide Demolli-Nimani, ka vlerësuar se angazhimi i politikanëve në fushatë zgjedhore do të pengojë në punën në Kuvend.
“Do të jetë sfidë në vete kur e ke parasysh që janë zgjedhje të rregullta, fushata zgjedhore zgjat 30 ditë dhe vërtetë di të jetë sfidë, jo vetëm sa i përket anës së Kuvendit”.
“Por njësoj e kemi edhe me ministrat të cilët kandidojnë për kryetar të komunave dhe puna e tyre do të jetë një hendikep derisa nuk e lirojnë pozitën aktuale që të merren vetëm me fushatë gjatë zgjedhjeve”, thotë Demolli-Nimani.
Sesioni vjeshtor i Kuvendit të Kosovës dhe fushata zgjedhore kishin filluar në javën e tretë të shtatorit, pra në të njejtën kohë.
Ndërsa, zgjedhjet lokale në Kosovë janë mbajtur më 17 tetor.
Më 14 nëntor, raundi i dytë i zgjedhjeve për kryetarë zhvillohet në këto 21 komuna: Gjakovë, Gllogoc (Drenas), Gjilan, Dragash, Istog, Kaçanik, Klinë, Fushë Kosovë, Kamenicë, Obiliq, Rahovec, Podujevë, Prishtinë, Prizren, Shtime, Viti, Vushtrri, Malishevë, Junik, Mamushë dhe Kllokot.
Komunat të cilat kanë shënuar fitore duke mos shkuar fare në balotazh janë Deçani, Mitrovica Jugore, Leposaviçi, Lipjani, Novebërda, Peja, Shtërpca, Suhareka, Ferizaj, Zubin Potoku, Zveçani, Hani i Elezit, Graçanica, Ranillugu, Parteshi, Mitrovica Veriore dhe Skenderaj. Që një kandidat të fitojë pa balotazh i duhen 50 për qind plus një votë.
Po ashtu, fushata zgjedhore në Kosovë për subjektet politike dhe kandidatët të cilët do të garojnë në raundin e dytë për zgjedhjet lokale do të jetë pesë ditore, do të fillojë më 8 nëntor dhe do të përfundojë më 12 nëntor.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
