Dy demokratë kryesorë në Kongresin Amerikan kanë rënë dakord për një marrëveshje të madhe armësh për Izraelin, duke përfshirë pesëdhjetë avionë luftarakë F-15 me vlerë më shumë se 18 miliardë dollarë, raportoi të hënën Washington Post.

Kjo duke cituar tre zyrtarë amerikanë të paidentifikuar.

Përfaqësuesi Gregory Meeks dhe senatori Benjamin Cardin pranuan marrëveshjen të hënën pasi bllokuan shitjen e armëve për muaj të tërë për shkak të presionit nga administrata e presidentit amerikan Joe Biden dhe grupeve pro-izraelite.

Gregory Meeks, demokrati i renditur në Komitetin e Punëve të Jashtme të Dhomës së Përfaqësuesve dhe Benjamin Cardin, kryetar i Komitetit të Marrëdhënieve me Jashtë të Senatit, janë dy nga katër ligjvënësit që kanë një veto efektive mbi shitjet ushtarake të huaja.

Homologët e tyre republikanë e miratuan këtë kontratë disa muaj më parë.

Të dy fillimisht bllokuan marrëveshjen derisa morën garanci nga administrata Biden se si do të përdoreshin avionët dhe armët në Gaza, ku më shumë se 37 mijë palestinezë janë vrarë që nga fillimi i luftës pas sulmit të pashembullt të Hamasit më 7 tetor 2023.

Sa palestinezë vlen një jetë izraelite?

Eric Harris, drejtor i komunikimit për Komitetin e Marrëdhënieve me Jashtë të Senatit, i tha Washington Post: “Çdo pyetje apo shqetësim është adresuar në konsultimet tona të vazhdueshme me administratën (Biden) dhe kjo është arsyeja pse ai mendoi se ishte e përshtatshme që kjo çështje të ecë përpara”.

Nëse miratohet, marrëveshja do të ishte një nga shitjet më të mëdha të armëve për Izraelin që nga fillimi i luftës në tetor 2023.

Administrata e Biden po konsideron gjithashtu heqjen e pezullimit të dërgesës së një ngarkese prej 1,800 bombash, i thanë Postit zyrtarë të njohur me këtë çështje, pavarësisht faktit se armët amerikane, përfshirë bombat janë lidhur me ngjarjet e vrasjeve masive gjatë operacioneve ushtarake të Izraelit në Gaza.

Dërgesa u pezullua në maj për shkak të shqetësimeve të SHBA-së për viktima të mundshme civile në Rafah përballë një ofensive izraelite në rajonin më jugor të enklavës.