Shqiptarët e mbyllën vitin më optimist për ecurinë e gjërave, vëren sondazhi

Sondazhi i Euronews Albania në muajin dhjetor ka zbuluar se 56.7 për qind e të anketuarve mendojnë se gjërat po shkojnë keq ose shumë keq në Shqipëri.

Por, publikimi më i fundit i barometrit të transmetuesit shqiptar tregon se ka një rritje të optimizmit te shqiptarët nëse i referohemi muajit tetor të vitit të kaluar.

Të pyetur se si mendojnë se po shkon situata në përgjithësi në vendin tonë, 15.6 për qind e qytetarëve të anketuar janë përgjigjur mirë/ shumë mirë, 56.7 për qind keq/shumë keq ndërsa 27.4 për qind e tyre as mirë/as keq.

Për të njëjtën pyetje, Barometri përcaktonte në sondazh për muajin tetor se 75.5 për qind e të anketuarve mendonin se gjërat po shkonin keq/shumë keq dhe vetëm 19.5% as mirë/as keq.

Perspektiva për situatën në përgjithësi i sheh pak më optimit gjithashtu qytetarët shqiptarë.

Duke iu referuar të dhënave të sondazhit, në muajin tetor 4.8 për qind e të anketuarve mendonin se situata në përgjithësi në Shqipëri ishte mirë/shumë mirë.

Ndërkohë që në muajin dhjetor, kjo shifër ishte pothuajse katër herë më e lartë (15.6 për qind).

Nëse do t’i adresohemi të anketuarve në bazë të preferencave politike, do të zbulojmë se më shumë se 80 për qind e qytetarëve me Partinë Demokratike mendojnë se gjërat po shkojnë keq ose shumë keq në vendin tonë.

Ndërsa shifra më e lartë në radhët e Socialistëve mbajnë një qëndrim neutral për zhvillimet në të ardhmen, me 41 për qind të të anketuarve.

Të pyetur nëse mendojnë se gjërat në Shqipëri po shkojnë në drejtimin e duhur apo në drejtimin e gabuar edhe këtu gjejmë gjurmë të lehta optimizmi mes tyre.

Nëse në muajin tetor, 62 për qind e qytetarëve të anketuar mendonin se gjërat ishin në drejtimin e gabuar, dy muaj më pas vetëm 54 për qind mendonin po njësoj.

Në të dyja rastet perspektiva neutrale e të anketuarve raportohej në 21 për qind gjatë dy mujoreve të ndryshme.

Në tetor, sipas sondazhit, vetëm 15.8 për qind e qytetarëve mendonin se gjërat ishin në drejtimin e duhur.

Kjo shifër u rrit në 23.6 për qind gjatë mbylljes së vitit 2022

Nëse do t’i adresohemi të anketuarve në bazë të preferencave politike, zbulojmë se më shumë se 86 për qind e qytetarëve me Partinë Demokratike mendojnë se gjërat po shkojnë në drejtimin e gabuar.

Ndërsa shifra më e lartë në radhët e Socialistëve me 55 për qind mendojnë se gjërat po shkojnë në drejtimin e duhur.

Gjetjet janë të Barometrit të Euronews Albania, realizuar në periudhën 3-13 dhjetor 2022, kryer nga MRB dhe Data Centrum, në nivel kombëtar me 1 mijë intervista ballë për ballë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.