“Shqiptarët e Luginës do refuzojnë detyrimin ushtarak në Serbi”, Mustafi: Sulmi terrorist në Banjë tregoi kush synon agresionin

Ish-kryetari i Këshillit Kombëtar Shqiptar në Luginën e Preshevës, Ragmi Mustafi, ka thënë se vendimi i Presidentit të Serbisë, Aleksandër Vuçiç për rikthimin e shërbimit të detyruar ushtarak e kërcënon sigurinë në rajon dhe se shqiptarët do ta refuzojnë.

“Në vend që të kultivojë fqinjësinë e mirë dhe stabilitetin rajonal, ndërmerr veprime luftënxitëse. Në vend të paqes e drejtësisë, paralajmëron rikthimin e shërbimit ushtarak të detyrueshëm pushteti i Vuçiçit. Në vend të demokracisë dhe bashkëpunimit, kërcënon dhe cenon sigurinë gjithandej rajonit”, tha ai në një bisedë për Albanian Post.

“Shqiptaret e Luginës së Preshevës do ta refuzojnë detyrimin ushtarak në Serbi, si kundërpërgjigje ndaj mendësisë e të rikthyerit në të kaluarën e përgjakshme. Serbia, sot nuk është e kërcënuar nga asnjë prej vendeve fqinje, madje përkundrazi, rasti i 24 shtatorit vitit të kaluar në Banjë ka treguar për cenimin e integritetit të vendeve fqinje dhe kush synon agresorin”, potencoi ai.

Mustafi ka theksuar se kjo është një situatë që nuk ka lidhje me detyrim ligjor, por me një parim bazë të dinjitetit dhe respektit për të drejtat e shqiptarëve, derisa ka potencuar se në një shtet ku shqiptarët trajtohen si qytetarë të dorës së dytë, ku ka një histori tmerrshme diskriminimi, nuk mund të kërkohet nga të rinjtë shqiptarë që të vënë jetën dhe të ardhmen e tyre në duart e atyre që nuk i njohin as këto të drejta.

“Të rinjtë shqiptarë, në këto kushte, nuk kanë asnjë garanci për sigurinë e tyre. Flasim për një shtet ku politika ndaj shqiptarëve ka qenë gjithmonë e ndarë nga standardet e demokracisë dhe barazisë. Pra, kush mund të na sigurojë se ata do të trajtohen me dinjitet?”, ka pyetur ai.

“Ne e dimë shumë mirë çfarë do të thotë të jesh shqiptar në Serbi dhe nuk duhet te lejojmë që rinia jonë të përballet me një realitet të tillë të pasigurt dhe të padrejtë. 3. Kjo çështje vetëm sa do të acaronte situatën tashmë të brishtë në Luginë. Kryerja e shërbimit ushtarak nga të rinjtë shqiptarë, nën këto kushte, do të shënonte një përkeqësim të marrëdhënieve ndëretnike dhe një rritje të tensioneve”.

Ndryshe, Presidenti i Serbisë, Aleksandër Vuçiç, ka njoftuar të shtunën se si komandat suprem i ushtrisë serbe ka nënshkruar pëlqimin për kryerjen e shërbimit të rregullt ushtarak për 75 ditë.

“Dua të besoj se Qeveria e Serbisë do ta miratojë atë vendim. Dua të besoj se të gjithë e kuptoni se sa shumë na duhet një ushtri e fortë, sa më shumë do të na duhet të blejmë armë, të bëjmë, të krijojmë”, tha Vuçiç në promovimin e nëntogerëve më të rinj të ushtrisë serbe.

Duke kujtuar ushtarët shqiptarë të sjellë në arkivole nga APJ-ja, të rinjtë e Luginës do refuzojnë shërbimin ushtarak

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.