![](https://albanianpost.com/wp-content/uploads/2022/08/destinations-london-banner-mobile-1024x553-1-1.jpg)
Trafikantët e qenieve njerëzore po reklamojnë në TikTok shërbimet e tyre për t’i çuar emigrantët përmes Kanalit Anglez me gomone– duke paguar deri në 4 mijë e 500 paund për person.
Madje, shqiptarët duken edhe më “seriozët” në rrjet mbi këtë çështje.
Me një vrojtim të thjeshtë që Albanian Post bëri në Tik Tok, mund të zbulohen dhjetëra llogari shqiptare në platformën e mediave sociale që mburren me suksesin e trafikimit në Britani të burrave, grave dhe fëmijëve nga Franca.
Kontaktet bëhen nëpërmjet vetë aplikacionit të Tik Tok-ut apo numrit të telefonit.
https://www.tiktok.com/@calaisdover11/video/7122879827945803013?is_copy_url=1&is_from_webapp=v1&q=rruga%20per%20angli%20san&t=1659520906250
Video të tjera, të shpërndara në mediat sociale, tregojnë gomonet mbi të cilat shtrydhen emigrantët e paligjshëm, ndërsa negociojnë udhëtimin prej 21 miljesh detare.
Postimet në Tik Tok përfshijnë datat e kalimeve dhe pamjet e njerëzve që largohen nga Franca dhe ata të cilët hyjnë në varka.
https://www.tiktok.com/@rruge_per_angli1/video/7096951639264840965?is_copy_url=1&is_from_webapp=v1&q=rruga%20per%20angli%20san&t=1659520906250
Video të tjera të shumta vazhdojnë të transmetojnë se sa të ngushta mund të bëhen varkat e vogla me emigrantët të veshur me jelek shpëtimi.
Forcat Kufitare britanike shihen në sfond gati për të përgjuar anijet dhe për të shpëtuar udhëtarët nga krahu tjetër.
https://www.tiktok.com/@_calais_dover_/video/7120141097136852229?is_copy_url=1&is_from_webapp=v1&q=rruga%20per%20angli%20san&t=1659520906250
Një burim, i tha Albanian Post se “ka video të njerëzve që tregojnë se si t’i kontaktojnë”.
“Është shumë e lehtë, me një kërkim të thjeshtë në Tik Tok siguron një rrugë për në Angli. Nëse është kaq e lehtë për mua, atëherë pse autoritetet nuk po bëjnë diçka për këtë?”.
Klipet e Tik Tok-ut vijnë pasi 696 persona u raportuan se kaluan Kanalin me varka të vogla të hënën – numri më i lartë në një ditë të vetme deri më tani këtë vit.
Sipas këtyre të dhënave do të thotë se më shumë se 17 mijë persona e bënë udhëtimin këtë vit, që do të thotë se ka të ngjarë që totali prej 28 mijë e 526 i vitit 2021 pritet të tejkalohet.
Vitin e kaluar, media angleze Daily Mail raportoi se kriminelët shqiptarë po paguheshin deri në 20 mijë paundë për të kontrabanduar emigrantë në Mbretërinë e Bashkuar me kamionë.
https://www.tiktok.com/@calais_uk247/video/7117352647815957766?is_copy_url=1&is_from_webapp=v1&q=rruga%20per%20angli%20san&t=1659520906250
Nga ana tjetër, sa i përket politikave të Tik Tok, videot bien ndesh me rregullat e kushteve të platformës së mediave sociale, të cilat përcaktojnë se përdoruesi “nuk duhet të postojë, transmetojë drejtpërdrejt ose të shpërndajë në ndonjë mënyrë tjetër përmbajtje në platformë që përbën, inkurajon ose jep udhëzime për një vepër penale, ose aktivitete të rrezikshme që mund të çojnë në lëndim i rëndë, vdekje ose vetëlëndim”.
Një zëdhënës i Tik Tok foli për këtë çështje me median britanike GN News, e cila gjithashtu raportoi për trafikimin e njerëzve nëpërmjet reklamave të aplikacionit, dhe tha se “politikat tona thonë se për të parandaluar përfshirjen e përdoruesve në aktivitete kërcënuese për jetën ose shfrytëzimin nga të tjerët, përmbajtjet që përshkruajnë, promovojnë, koordinojnë ose lehtësojnë kontrabandën njerëzore nuk lejohen në TikTok”.
“Unë jam duke shqyrtuar përmbajtjen me mbështetjen përkatëse gjuhësore, llogaritë e shënuara ka të ngjarë të ndalohen sipas politikës së përmendur më lart”.
Çfarë i shtyn shqiptarët të largohen?
Bazuar në sondazhin e kryer nga Fondacioni “Friederich Ebert” (2018-2019), 40 për qind e të pyeturve kanë shprehur dëshirën për t’u larguar nga Shqipëria përgjithmonë, ndërsa 20 për qind kanë një dëshirë të moderuar për të emigruar.
Sipas tyre, arsyet kryesore janë kërkesa për standard më të mirë jetese dhe për një punësim më të kënaqshëm, ndërkohë që arsimi mbetet dytësor si motiv për t’u larguar.
![](https://albanianpost.com/wp-content/uploads/2022/08/angli-1.jpg)
Fondacioni tregon se, destinacioni më i dëshirueshëm për të gjithë ata që duan të ikin është Gjermania, e ndjekur nga Mbretëria e Bashkuar, Italia dhe Franca.
Bazuar në këtë fenomen, Sociologia Brunilda Zenelaga, në një intervistë për Albanian Post tha se “zgjedhja për t’u larguar nga Shqipëria lidhet me politikat tërheqëse, që kanë këto vende, kryesisht Anglia, Gjermania dhe vendet nordike. Ky largim nuk është trend vetëm në Shqipëri, por edhe për disa shtetet e rajonit”.
Emigracioni, si fenomen i krijuar nga rrethana të ndryshme, ka lënë gjurmë si në vendin pritës, edhe në atë të origjinës.
Në rastin e Shqipërisë, siç thotë dhe sociologia, pasojat janë të disa kategorive.
“Pasojat që sjell emigracioni, duke u larguar pjesa më vitale e shoqërisë që është rinia, humbet energjia e vendit, kategoria e aftë për punë, për të sjellë ndryshim, parë dhe në planin e skemës së kontributeve”.
![](https://albanianpost.com/wp-content/uploads/2022/08/nintchdbpict000369146844.jpg)
Sipas saj, nëse të rinjtë largohen, kontributet shëndetësore dhe sidomos ato që lidhen me skemën e pensioneve bien në masë të konsiderueshme.
“Largimi i të rinjve të kualifikuar shkakton kriza në institucionet ku punojnë, sidomos në raste kur vendi është në gjendje emergjente, marrë shkas nga fenomeni i fundit, siç është lufta”.
Ajo vë theksin te pasojat e shumëfishta që has një vend kur përballet me këtë fenomen.
“Pasojat e shumëfishta, ku vendi humbet këtë kategori, ndërkohë që punojnë në vende të tjera, kontributi shkon për këto vende, duke lënë mangët Shqipërinë”, përmbyll Zenelaga.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com