Shqipëria si garantuese e stabilitetit energjetik rajonal

Shqipëria mund të kthehet në një forcë të vërtetë energjetike në gjithë rajonin e Ballkanit Perëndimor, ku investitorët e huaj janë të gatshëm të investojnë për një plan të ri zhvillimor, i cili mund ta bëjë vendin tonë “eksportues neto të energjisë”.

Gjatë një konference me investitorë të rëndësishëm nga SHBA-të dhe Bashkimit Evropian, ishte ministrja e Infrastrukturës dhe Energjisë, Belinda Balluku, ajo e cila foli më së pari për planin e zhvillimit.

Një sërë projektesh përfshihen në të, duke veçuar hidrocentralin e Skavicës apo edhe projektin për ndërtimin e TEC-it në Vlorë, i cili pritet të prodhojë energji elektrike nëpërmjet gazit natyror.

Duke parë edhe zhvillimet e fundit mbi energjinë në Evropë, ku së fundmi Rusia ka ndërprerë furnizimin me gaz për Poloninë dhe Bullgarinë, është më e nevojshme se kurrë të gjenden rrugë alternative për energjinë në kontinentin e vjetër.

Pikërisht në këtë skenar, mund të bëhet pjesë edhe Shqipëria, për shkak të kalimit të projektit të gazsjellësit adriatiko-jonian TAP në një pjesë të territorit.

“Kriza ndërkombëtare s’ka kursyer asnjë shtet. Konferenca vjen në një situatë të vështirë në të gjithë botën. Projekti ynë, ku një nga komponentët kryesorë është lidhja e TAP-it me Evropën, ka tërhequr vëmendjen e aktorëve më të mëdhenj të sektorit të gazit”, tha Balluku gjatë fjalës së saj.

Nga ana tjetër, kryeministri Edi Rama ishte edhe më optimist mbi çështjen, duke theksuar se jo vetëm Shqipëria ka potencial për të qenë një fuqi energjetike rajonale, por edhe evropiane.

Në këtë ekuacion, ai përmendi kalimin e gazit azer në Shqipëri, për të shkuar më pas në Evropë.

Gjithashtu, nuk ngurroi të parashtronte aspektin e vetëmjaftueshmërisë energjetike të Shqipërisë, gjë e cila nëse arrihet, do të mund të ndikojë më pas në eksportimin neto të energjisë në kontinent.

Nga ana tjetër, ambasadorja e SHBA-ve në Shqipëri, Yuri Kim, ka theksuar se është koha për të diversifikuar burimet e energjisë dhe se Shqipëria është një prej vendeve që mund të ndihmojë me këtë gjë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.