Shqipëria nuk humbi, fitoi besimin tek një brez i ri

Veç një gol ishte ndarja midis Shqipërisë dhe Polonisë, në një ndeshje ku ekuilibri ishte i qartë dhe shpesh avantazhi – mbi të gjitha në pjesën e parë – anonte për nga kuqezinjtë.

Por, futbolli i tillë është. Fitorja u shkoi polakëve dhe ëndrrat kuqezi për një pjesëmarrje të mundshme, për herë të parë në një kampionat botëror të futbollit, u shuan.

Për opinionistin sportiv Fation Shehu, edhe pse shpresa nuk duhet humbur, shanset matematikore janë të pakta. Këtu duke futur edhe një kalendar favorizues të polakëve në dy ndeshjet e mbetura, ku kuqezinjve u duhet të përballen edhe me Anglinë.

Gjithsesi, sipas tij, edhe pse e ashtuquajtura “finale” e shanseve u humb, Shqipëria ka fituar.

Së pari, për të, futbolli shqiptar ka fituar një brez të shkëlqyer.

“Kemi futbollistë në moshë shumë të re, që këtë edicion kanë hedhur bazat e një brezi që ka për të vazhduar ecurinë e rezultateve historike”, thotë ai për Albanian Post. “Me moshë të re, të talentuar dhe njëkohësisht me eksperiencë, pasi luajnë në nivele të larta me klubet evropiane”.

Nga ana tjetër, ajo çfarë kanë fituar shqiptarët, është edhe besimi. Kjo, pavarësisht se kohët e fundit ka pasur një ristrukturim të kombëtares.

“Ky brez ofron besim”, vijon ai. “Deri në ndeshjen me Poloninë, ky ekip riktheu besimin, se është një skuadër që mund t’ia dalë dhe të fitojë ndaj kujtdo”.

Ndeshja ndaj Polonisë, sipas Shehut, ishte e vështirë edhe për faktin se ata janë në fund të një brezi të artë të futbollit.

Ndërkaq, Shqipëria, në këtë edicion eliminatoresh, ka fituar stafetën e një brezi të ri, që ofron besim.

Pikërisht për këtë arsye, analizat taktike janë të kota sipas Shehut. Duele të tilla për të, fitohen nga episodet, jo nga diferencat në fushë. Gjë që ndodhi në favor të polakëve këtë herë.

Sytë nga Euro 2024?

Gazetari sportiv Gjergji Stefa ndan të njëjtin mendim me Shehun mbi ndodhitë e ndeshjes, duke shtuar se shanset për t’u kualifikuar, janë njësoj sikur të bashkohen Koreja e Veriut dhe ajo e Jugut. Por kjo nuk është një dramë për Kombëtaren.

Ai për Albanian Post, shpjegon se shpresa e vërtetë, do të jetë kualifikimi për në Euro 2024. Kjo, bazuar edhe në ecurinë e dy lojtarëve.

Mbi vendimet e radhitjes së formacionit nga tekniku Edoardo Reja, Stefa argumenton se ato ishin të detyruara. Kjo, për faktin se dy lojtarë shqiptarë ishin të dëmtuar dhe dy të tjerë, ishin të infektuar me COVID-19.

Gjithsesi, ai nuk e fsheh faktin se ndonjë ndryshim, për shembull futjen në lojë të Brojës dhe Bajramit që nga minuta e parë, do ta kishte bërë.

“Do të kisha zgjedhur më mirë të kishim humbur me ata të dy në fushë nga minuta e parë. Gjithsesi, asnjë dramë”.

Në pozitën e tretë në tabelë, me dy pikë më pas se sa vendi i dytë i Polonisë, asgjë nuk mund të parashikohet mbi përfundimin e fazës së grupeve, në nëntor.

Ajo çfarë ka rëndësi, është fakti se vendi i tretë është thuajse i blinduar. Për më tepër, përfaqësuesja nuk ka mbledhur ndonjëherë kaq shumë pikë në një fazë grupesh.

Koka kurrsesi nuk mund të mbetet e kthyer nga e shkuara. Sytë, duhet të jenë për nga e ardhmja.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.