Shqipëria do të hapë një zyrë ndërlidhëse tregtare në Jerusalem.
Kjo u bë me dije pas vizitës së presidentit izraelit, Isaac Herzog, në Tiranë.
Zyra e presidencës izraelite shkruan se vendimi shënon një përmirësim të rëndësishëm në marrëdhëniet e forta midis dy kombeve dhe përfaqëson një simbol të miqësisë së thellë midis dy popujve.
Udhëtimi i Herzog shënoi vizitën e parë zyrtare të kreut të shtetit të Izraelit në Shqipëri.
Ai në konferencën për shtyp me kryeministrin e Shqipërisë, Edi Rama, theksoi se që nga sulmi i tetorit, “Shqipëria është vendosur në mënyrë të palëkundur në anën e duhur të historisë”.
“Po i afrohemi 1 viti që kur Hamasi sulmoi në mënyrë brutale Izraelin, kur mijëra terroristë hynë në vendin tonë, vranë egërsisht mijëra dhe rrëmbyen qindra izraelit dhe të huaj në Gaza. Që prej asaj dite të errët në tetor, Shqipëria është vendosur në mënyrë të palëkundur, është radhitur në anën e duhur të historisë”.
Herzog solli në vëmendje se si shqiptarët dhe hebrenjtë ndajnë një histori të gjatë.
“Hebrenjtë e Evropës gjetën strehë në Shqipëri gjatë Holokaustit. Kemi shumë për të mësuar me njëri-tjetrin, i kënaqur që gjendem këtu dhe eksplorojmë lidhje të reja”.
E për këtë të fundit ai tregoi se me të ka anëtarë të rëndësishëm biznesi në delegacion dhe kjo tregon shumë për afërsinë mes dy vendeve.
“I kënaqur që pata mundësinë t’i diskutoj këto gjëra. Kombi shqiptar qëndroi krah nesh gjatë kohëve të vështira”.
Herzog u prit nga presidenti Bajram Begaj.
Bashkëpunimi dypalësh, zhvillimet në rajonin e Ballkanit Perëndimor, Kosova, situata në Lindjen e Mesme dhe çështjet e sigurisë kibernetike ishin në fokus të bisedës kokë më kokë.
Begaj, e konsideroi këtë vizitë si një mundësi të shkëlqyer për gjetjen e mundësive të reja të forcimit të bashkëpunimit, duke shprehur përkushtimin e tij dhe të Shqipërisë në këtë drejtim.
Sipas Presidentit, të njëjtat ndjenja ndajnë edhe shqiptarët në Kosovë dhe në rajonin e Ballkanit Perëndimor dhe, në këtë aspekt, njohja e pavarësisë së Kosovës nga Izraeli është një vendim shumë i rëndësishëm gjeopolitik, me ndikim pozitiv rajonal.
Për sa i përket zhvillimeve në Ballkan, Begaj u shpreh se për shkak të pozicionimit gjeopolitik, rajoni është i prekshëm ndaj kërcënimeve, duke përfshirë terrorizmin dhe ekstremizmin, migracionin, kërcënimet hibride, sigurinë kibernetike dhe praninë e aktorëve të tretë destabilizues.
“Shqipëria, – theksoi Kreu i Shtetit, – i mbetet mirënjohëse Izraelit për kontributin e dhënë për të rritur kapacitetet e saj të mbrojtjes kibernetike në rrethana shumë të vështira dhe kritike pas sulmeve kibernetike të Iranit në vitin 2022.
Gjatë takimit kokë më kokë, krerët e dy shteteve biseduan për zhvillimet në rajonin e Lindjes së Mesme, për të cilat Presidenti i Republikës rikonfirmoi qëndrimin e Shqipërisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
