Shqipëria

Shpërthim me tritol në shtëpinë e Armand Dukës


Një shpërthim me tritol ka ndodhur në shtëpinë e kreut të Federatës Shqiptare të Futbollit, Armand Duka, pas disa ditëve me retorika të ashpra ndërmjet tij dhe kreut të Bashkisë së Tiranës, Erion Veliaj, i cili a ka quajtur Dukën “beu” i futbollit shqiptar, duke e akuzuar si pjesë e një grupi mafioz, i cili ka marrë peng federatën dhe gjithë futbollin shqiptar.

Sipas burimeve të Albanian Post, shpërthimi ka ndodhur në derën e jashtme të banesës së Dukës.

Teksa, vetë Duka, nga vendi i ngjarjes, ka deklaruar se shpërthimi ka qenë i fortë. Sakaq, kamerat e sigurisë sipas tij, e kanë filmuar gjithë ngjarjen. Një person me kapuç, ka qenë ai i cili e ka vendosur lëndën plasëse dhe është larguar nga vendngjarja.

Gjithsesi, ai nuk dëshiroi të hidhte dyshime pa pasur një hetim nga Policia

Në vendngjarje ndodhen edhe forca policore, për të sqaruar rrethanat e ngjarjes.

Pamje nga vendi i ngjarjes

E gjithë kjo ngjarje vjen pas një epopeje të vërtetë mes Dukës dhe Veliajt, në një luftë aspak të zakontë për 20 vjetët e fundit, në futbollin shqiptar.

Duka, për të gjashtin mandat në krye të FSHF-së, garon në zgjedhjet e 2 marsit, përballë komentatorit të njohur sportiv, Dritan Shakohoxha.

Mirëpo, e diela e 23 janarit, do të bënte që mediat të gëlonin mbi një çështje të paprecedente në Shqipëri.

Bashkia e Tiranës, në rolin e aksionerit të Sport Klub Tirana, do të padiste Armand Dukën për një sërë akuzash, ndër të cilat korrupsion në krye të FSHF-së, duke përpiluar një dosje voluminoze edhe ndërkombëtare.

Nga ana tjetër, nga vetë federata, përgjigja erdhi e shpejtë.

Sipas tyre, akuzat kishin të bënin me një përpjekje për të destabilizuar garën zgjedhore. Por, ato u faktuan të hënën e 24 janarit, kur Prokuroria e Tiranës nisi zyrtarisht hetimin për Dukën.

Megjithatë, nga vetë federata, çështja u shpërfill. Ata u fokusuan tek goditja ndaj vetë Veliajt dhe nxorrën në dritë një audiopërgjim 30 minutësh, nga mbledhja e kryebashkiakut të Tiranës më disa zyrtarë të klubeve sportive tiranase.

Në të, Veliaj dëgjohej teksa fliste me tone të ashpra ndaj Dukës dhe dy dekadave të tija në FSHF.

Më pas, episodi i radhës u zhvendos në zgjedhjen e kryetarit të ri të Shoqatës rajonale të Futbollit Tiranë. Me 44 vota, Krenar Alimehmeti u shpall fitues.

Mirëpo, këtë vendim, Veliaj dhe drejtues të tjerë klubesh sportive në Tiranë, e kanë cilësuar si një farsë, pasi sipas tyre, asnjë nga shoqatat nuk i njihte ata të cilët votuan.

Dy kallëzime penale të reja sakaq, do të bëhen kundrejt strukturave të FSHF-së.

E para, do të jetë për sekretarin e Përgjithshëm të federatës, Ilir Shulkun. Tjetra, për sekretarin e shoqatës rajonale të futbollit.

“Disa njerëz do të bëjnë burg për këtë çështje”, u duk i bindur Veliaj. “Do të shkojnë në burg! Është e pafalshme! do shkojnë në burg. Kjo është kriminale”.

Të pranishëm në takim me të, ishin edhe përfaqësues nga 20 shoqata.

/Albanianpost.com


Lajmet kryesore